2638/2024-2025

Saitual, the 22nd October 2024: Vawiin chawhma dar 11:00 am khan District Agriculture Marketing Committee (DAMC), Saitual District buatsaihin DC Conference hall, Saitualah, Bana Kaih Policy hnuaia thlai thar hralh Sensitization-cum-Consultation meeting neih a ni a, District Bawrhsap, DAMC Chairman ni bawk Dr. Lalngura Tlau chuan he hun hi a kaihruai a ni. 

He hunah hian DAMC Chairman Dr. Lalngura Tlau chuan thu sawiin, DAMC member te, MAMB member te leh line department te Thlai thar marketing zirchiang tura an lo kalkhawm thei chu lawmawm a tih thu a sawi a. Chairman chuan Saitualah chuan DAMC chu vawi khat an lo thukhawm tawh tih a sawi a, Bana Kaih Policy hnuaiah district chhunga society 44 te chu Committee-in an lo pawm tawh a ni, a ti.  He programme hi loneitute tana chhenfakawm tak tur a ni, a ti a, kan ram economy than nan zel pawhin a pawimawh hle a, chuvang chuan he zirchianna hun hi kalkhawmte chuan hlawkthlak taka an hman a beisei tih a sawi bawk.  

He sensitization-cum-consultation meeting-ah hian Pu Vanlalpeka, MAMB aiawh chuan Bana Kaih (Hand-holding) Policy 2024 chu a sawi zau a. Thlai Thar marketing chungchang chu Pu H. Lalchhanhima, MAMB aiawhin power point presentation hmangin zirchianna hun neih a ni bawk.  

He hunah hian DAMC member te, MAMB member te, District-a Bank aiawhte leh line department te an tel a ni. Kalkhawmte chuan zawhna leh chhanna hun hlawkthlak tak an hmang a, DAMC Member Secy, Pu A. Lalhmachhuana chuan lawmthu sawiin hun a khar a ni.