4357/2024-2025

Saitual, the 20th February, 2025:  Vawiin chawhma dar 11:00 khan Saitual Public Playground-ah, Pastor Thangchhuaka, PCI, Saitual bial kaihhruainain State Day puala ram pum huap tawngtaihona “State Day of Prayer 2025” hman a ni a, District Bawrhsap Dr. Lalngura Tlau chuan he hun hi a hmanpui.    

Saituala State Day of Prayer 2025 inkhawm hi Saitual District State Day of Prayer Committee in a huaihawt a, kumin thupui atan ram 'siamthar lehna' hawi tur a nih avangin “Fiji Challenge” tih a ni a. Kumin tawngtai thupui atan “I ram lo thleng rawh se”, Matthaia 6:10 chu thlan a ni.

He hunah hian District Bawrhsap Dr. Lalngura Tlau chuan thu sawiin, State Day lo pian dan te a sawi zau a. Kum 1986-ah MNF leh India Sawrkar chuan inremna thuthlung ziakin, February ni 20, 1987 khan Mizoram pawh UT atang State-ah a inhlang kai a ni tih a sawi. Bawrhsap chuan State puitling a nih hnuah Mizoram mai bakah Saitual District ngeiah pawh hmasawnna tam tak hmuh tur a awm tih a sawi a, State a nih theih nana thawktute leh remna leh muanna a awm theih nana nunna hial lo chan tawh te hre thar leh turin kalkhawmte chu a chah a ni. Dr. Lalngura Tlau chuan Saitual District-a khaw 40-ah State Day pual hian tawngtaihona neih a ni dawn tih a sawi a, he hunah hian kalkhawmte chu thinlung taka Mizoram tana tawngtai turin a ngen nghal a ni. 

Vawiin inkhawm tawngtaina thupui hi pa thuma then a ni a, then khatna thupui hi “Kan ramah Pathian ram a lo thlen theih nan” tih niin, he hun hi Pastor Lalremruata Khalthang, SDA-in a kai hruai a. Capt. H Lalhmasanga, CO, Keifang Corp-in thupui then hnihna “Mipuite tan” tih chu kaihruaiin, thupui then thumna “Ram hruaitute tan” tih chu Pastor Lalsanglura Sailo, BCM, Saitual bial in a kaihruai a ni.

Saitual Corp band te chuan rimawi hmangin “Ro min rel sak ang che” tih hla an rem a, Saitual Chhim Veng Pastor Bial Zaipawlin hla an rem bawk a ni. State Day of Prayer 2025 inkhawm hi Pi H. Lalbiaktluangi, Treasurer, DSDPC chuan lawmthu sawinain a khar a ni.