4358/2024-2025

Dated Hnahthial, the 20th February, 2025: Mizoram Sawrkar flagship policy- Bana Kaih hnuaia Sawhthing lei leh hralh chhuah chu Hnahthial District-ah, Mizoram District dang rualin kalpui tan a ni a. District Agricultural Marketing Committee (DAMC) kaihhruaina hnuaiah Hnahthial District chhung khaw hrang hrang atanga Sawhthing chhun khawmna hmunpui - Secondary Collection Centre atangin buk a hralh chhuah tan niin March ni 20 thlengin thawh khatna (First Phase) hi kalpui tur a ni dawn a. Hnahthial Town chhunga Secondary Collection Centre (SCC) - Horticulture Department Godown atanga Sawhthing hralh tura phur chhuah chu Addl DC, Pu Zothanmawia Khiangte chuan a vai liam a ni.

Hnahthial District chhungah hian Secondary Collection Centre panga (5) - Hnahthial SCC, Cherhlun SCC, Darzo SCC, Tarpho SCC leh Chhipphir SCC te awmin heng SCC atang hian first phase chhung hian quintal 5250 vel hralh chhuah theih tura beisei a ni a. Vawiin hian SCC pathum - Hnahthial, Tarpho leh Darzo-ah te Society hruaitute leh officials te endikna hnuaiah Sawhthing hi buk niin Sairang lam pana phurh chhuah nghal an ni a. SCC dang pahnih - Cherhlun leh Chhipphir te chu naktukah buk a, hralh chhuah tan tura ruahmanna siam a ni.

Hnahthial SCC ah hian Society hruaitute bakah District Horticulture Officer, Pu Lalthakima chuan sawhthing phur leh buk hi vilin an endik a. Darzo SCC-ah Pu George Lalnuntluanga, District Fisheries Development Officer chuan Society hruaitute nen endikna nei ve thungin Tarpho SCC hi DAMC Member Secretary leh District Agriculture Officer ni bawk, Pu MS Dawngliana chuan Society hruaitute chu a endik pui a ni.

Tun first phase a Hnahthial District SCC tin atanga Sawhthing hralh chhuah theih tura beisei zat chu -

1. Hnahthial SCC (Horticulture Complex, Hnahthial) - 950 quintals

2. Darzo SCC (Venglai BCM hall hnuai, Darzo) - 1300 quintals

3. Tarpho SCC (Tarpho Community Hall) - 800 quintals

4. Cherhlun SCC ( Alu Godown hlui, Bethlehem Veng) - 1600 quintals

5. Chhipphir SCC (Social Welfare Godown, Chanmari, Chhipphir ) - 600 quintals

Sawhthing hi kg khat Rs.50 in sawrkar chuan a thar chhuak tute a leisak dawn a. Sawhthing hmun danga hralh chhuak duhte tan SCC kaltlang khera hralh chhuah a ngai lovang.