4359/2024-2025

Dated Serchhip, the 20^th February, 2025: Mizoram State Day 2025 pualin vawiin khan Serchhip Auditorium-ah ram tana tawngtai rualna hun hman a ni.

Serchhip District State Day of Prayer Committee buatsaiha tawngtai rualna hun hi District State Day Prayer Committee Chairman,  Pu Paul L. Khuma, DC Serchhip chuan hmanpuiin  kum 1987 khan Mizoram chu India ram State 23-na ni turin State dinhmun pek a nih thu leh Mizoram State a puan ni hu State Day atan hman a nih thu a sawi a. He State Day ah hian State kan nih hnua kan hmasawnna leh kan thlen chin te kan chhut let a kan inthlirlet leh hun lo kal zel turah engtin nge hma kan sawn zel ang tih kan ngaihtuah a pawimawh thu a sawi a, "Kan ram, khawtlang leh chhungkaw tan hian a hlawkna thlentu nge kan nih, a hekna thlentu tih kan ngaihtuah a ngai a ni," a ti.

Serchhip DC chuan tawngtai pawimawhzia sawiin, tawngtai rualna hun atana State Day hman chu lawmawm a tih thu pawh a sawi a. Mi tin ten kan chak lohna te, kan that lohna te inen-a a tha zawka insiam in khawtlang leh chhungkaw tana kan theihtawp kan chhuah a tul thu a sawi a. He huna kalkhawmte chu an tu leh fa, khawtlang hruaitu leh ram hruaitute, sawrkar hnathawk te leh zu leh ruihtheih thil dang avanga harsatna tawk mek te tana tawngtai tura sawmin, vawi tam tak tawngtaiin a chhanna an beisei ang an hmu lo a nih pawha beidawng mai lova tawngtai zel turin a sawm bawk a ni.

Serchhip-a State Day of Prayer puala hun hman hi hun khatna ah Rev. K. Ramdinthara, PCI Serchhip chuan kaihruaiin 'Mizoram mipui ten Lalpa lam kan hawi theih nan' tih thupui hmangin tawngtai rualna hun an hmang a. Hun hnihna ah Upa C. Lalrammuana, Christ Redemption Church Serchhip chuan kaihruaiin 'Pathian hnena lawmthu sawina' tih thupui hmangin tawngtai rualna hun an hmang bawk a ni.