4823/2024-2025

Saitual, the 26th March, 2025: Vawiin chawhma dar 11:00 khan Joint VC House, Saitualah, UD & PA department hnuaia Swachh Bharat Mission (Urban) 2.0 leh DAY-NULM hmalakna sikul bungraw inthleng runpui “Swap & Save Campaign” chu Er. Laldinsanga Hnamte, DUDO, Saitual in a hawng.

He hunah hian Er. Laldinsanga Hnamte, DUDO chuan kalkhawmte hnenah lawmthu a sawi a, Village Council member te chuan an theihna zawna UD & PA deparment te hma an lakpui thin chu lawmawm a tih thu a sawi. DUDO chuan RRR- reduce, reuse, recycle chu faina kawnga thupui pawimawh tak a nih angin, he Swap & Save Campaign pawh hi hemi kawnga hmalakna pawimawh tak a ni, a ti.

Er. Laldinsanga Hnamte chuan he campaign ina a tum ber chu zirlaiten an thawmhnaw leh zirlaibu hlui te hman tangkai tawh loh tur, midangte tana la rochun theih si, a thlawna a mamawh tena an dawn theih nan a ni, a ti. DUDO chuan he hmalakna hian chhungkaw tam tak phurrit a chhawk zangkhai a beisei thu sawiin, sikul bungraw hlui la tha si te bawlhlawha chan tir mai lo a, a hmang tangkai turte hnen a thlen ngei a duh thu a sawi. Village Council hotute chu he hmalakna a hlawhtlin theih nan a puanzarna kawngah theih tawp chhuahpui turin DUDO hian a sawm a ni.

Saitual District-ah hian Swap & Save Campaign hi March ni 26-28, 2025 chhunga neih tur a ni a, RRR (Reduce, Reuse, Recycle) Centre hi hmun hnih- Joint VC house, Saitualah leh Joint VC House, Keifangah te siam a ni a. He RRR Centre-ah te hian March ni 26-28 2025, zing dar 9:00-4:00 pm chhungin zirlai bungraw hrang hrang- zirlaibu, uniform, school bag, box, tiffin, etc a dah (donate) theih reng a, mamawh nei te tan pawhin a lak theih reng bawk a ni.