4824/2024-2025

Dated Aizawl the 26th March 2025 : Vawiin khan Sports & Youths Services Department bultumin, Cultural Centre cum Auditorium, Vaivakawn, Aizawlah, Viksit Bharat State Level National Youth Parliament chu hawnna hun hman a ni a. Pu Malsawmzuala Ralte, Chairman, Mizoram Youth Commission chuan he hun hi khuallian niin a hmanpui.

Hawnnaah hian khuallian MYC CHairman Pu Malsawmzuala Ralte chuan thu sawiin, zirlaite chu thawhrimna nena an thiltih apianga theihtawp chhuah thin turin a fuih a. Hlawhtlinna zawng zawng chu Tumruhnaa intan a ni tih sawiin, taima taka an thiltih apiangahte chuan tan la thin turin a fuih a. Pu Malsawmzuala Ralte chuan, Mizo thalaite zingah teirei peih loh vanga hlawhchham ta  an tam hle tih sawiin, hlawhtling tur chuan rei tak beih a tul a nih pawhin tha thlah lova tei rei peihna chu nei theuh turin zirlaite chu a sawm a. Hunbi nei thlapa an thiltih apiangte ruahmanna mumal tak nen a ti thin tura chahin, National Youth Parliament chu hlawkpui taka hmang theuh turin duhsakna a hlan nghal a ni.

Hawnna hun hi Dr Benjamin L. Saitluanga, PC, NSS Cell, MZU chuan kaihruaiin, kalkhawmte lo lawmna thu a sawi a. Pu Lalramsanga Sailo, Secretary, Sports & Youths Services-in hun hman dan tur tlangpui leh intihsiaknaa tel turte fuihna hun a hmang a. Pi Mercy Sellate, State Director NYKS chuan lawmthu sawiin hun hman hi a khar a ni.