643/2025-2026

Saitual, the 29th May, 2025: Vawiin khan DC Conference Room, Saitualah ni 15 chhung awh tur kuthnathawktute tana tunlai thiamna hmanga hmasawn dan tur inkawhhmuhna leh inzirtirna- “Viksit Krishi Sankalp Abhiyan (VKSA)” hawnna hun hman a ni a, District Bawrhsap Dr. Lalngura Tlau chu khuallian niin he campaign hi a hawng nghal a ni.   

He hunah hian District Bawrhsap Dr. Lalngura Tlau chuan thu sawiin, Viksit Krishi Sankalp Abhiyan (VKSA) Campaign chu Ministry of Agriculture & Farmers Welfare hmalakna niin, India ram puma District 700-ah kalpui tum a ni, a ti a. Saitual District chu Zone thum (3)- Saitual zone, Ngopa zone leh Phullen zone ah te then niin, heng zone-ah theuh te hian he campaign hi kalpui a ni dawn a ni, a ti.   

Bawrhsap chuan ei leh bar kawnga India ram a than chhoh dan te a tarlang a, ram ropui ni tur chuan ei leh bara intodelh a pawimawh a ni, a ti. Agricultural Technology Application Research Institutes (ATARI) hnuaiah farm centre- “KVK - Krishi Vigyan Kendras” chu district tina din tura tih niin, Saitualah pawh hma lak mek zel a ni, a ti a. Bawrhsap chuan KVK kaltlangin loneitute leh ran vulhtuten harsatna an tawh te chu tunlai thiamna leh technology thar zawk hmangin chinfel dan tur ngaihtuahsak an ni dawn a ni, a ti a, chumi inhrialhriatna atan chuan VKSA campaign hi a pawimawh hle a ni tih a sawi bawk.

Dr. lalngura Tlau chuan programme chu hlawkthlak thei ang ber a hmang tur leh inpawh leh langtlang taka line department te ho nen inkawmhona nei turin kuthnathawk kalkhawmte chu a sawm a ni.  

Vawiin VKSA Campaign hawnna hun hi Pi Hmangaihthangi Renthlei, DAO, Saitual chuan a kai hruai a, thusawi hi District Bawrhsap Dr. Lalngura Tlau, Dr. Lalrosangi Fanai, Program Assistant, KVK Aizawl (Animal Science), Pu Lalvensanga Pachuau, Farm Manager, M.Sc.(Soil Science), Dr. Samik Choudhury, Technical Officer, GKMS atang tein ngaihthlak a ni.   

VKSA hawnna inkhawm neih zawh hian Agriculture and allied sectors lama hotuten an department theuha kut hnathawktute tana sawrkar laipui scheme hrang hrang hrilhfiahna leh sawi zauna hun an hmang a, Pu Francis VL Ruata, Manager, SBI Saitual chuan sum leh pai hman dan kawnga inzirtirna- financial literacy campaign a nei nghal bawk a ni. Pu Peter Biakthansanga, Range Officer, Soil & Water Conservation Dept chuan lawmthu sawinain hun a khar.

Vawiina VKSA hawnna inkhawmah hian line department hotute, VC hruaitute, loneitute leh kuthnathawktute thahnem tak an tel a, Campaign hi ni 15 chhung awh tur niin May ni 29 atanga June ni 12, 2025 thleng neih tura rua hman a ni.