4131/2024-2025

Saitual, the 7th February, 2025: Vawiin chawhma dar 10:30 khan DC Office Chamber, Saitualah District Election Officer (DEO) leh District Bawrhsap ni bawk, Dr. Lalngura Tlau chuan Press mite kawmin Village Council Inthlanpui, 2025 lo awm tur atana Saitual District inbuatsaihnate an thlir ho.

He hunah hian District Election Officer Dr. Lalngura Tlau chuan Saitual District chu inthlan puan a nih hma atangin theihtawpa lo inpuahchahin kawng hrang hrangah hmalakna chak taka kalpui a ni tih a sawi a, inthlan hmachhawn turin an inpeih thawkhat hle a ni tih a sawi bawk. DEO chuan Returning Officer, Presiding Officer, Sector Officer leh Counting Officials te tan training hi vawi hnih neih a ni tawh tih sawiin, training-ah pawh an kal tha thin hle a ni, a ti. Dr. Lalngura Tlau chuan Inthlanna muanawm leh felfai a awm theih dan inkalpawhna kawngpui, kawlphetha, tui leh damdawi chungchangah pawh Line department hotute te vawihnih an thukhawm tawh tih a sawi bawk.

Saitual District Observer, Pi Marilyn Rualzakhumthangi pawhin thu sawiin Saitual District mipuite chuan vote thlak chungchanga hriat tur pawimawh te an hriat theih nan thu thar thehdarhtute chu an pawimawh hle a ni, a ti a. Observer chuan vote thi a tlem thei ang ber a awm theih nan leh vote tluang taka chhiar a nih theih nan vote thlak dan tur dik tak mipuite hrilhhriat kawngah hma la turin press mite chu a chah a ni.

Saitual District-a Election-a duty tur team hrang hrang ruat ngaite chu inruat fel vek a ni tawh a, training kalpui ngaite pawh zawh fel vek tawh niin team leh official hrang hrang te chuan an chanpual theuh tha takin an kalpui mek a ni.

State Election Commission-in Saitual District Observer atana an ruat Pi Marilyn Rualzakhumthangi, MCS, Deputy Secretary, DC & MA and SYS chuan Saitual District chu thutchilh mekin, Returning Officer ten nomination file chungchang leh scrutiny an neihte a enfiahpui tawh a, tunah hian Saitual District chhunga Polling station hrang hrang te dinhmun enfiahin a tlawh kual mek a ni. Observer hi VC inthlan chungchanga zawhna neite tan zawhfiah theih reng a ni bawk.

Ballot Paper chu Pu J. Lalhmahruaia, BDO Phullen & Nodal Officer kaihhruaina leh Security venhimna hnuaiah print zawh fel a ni tawh a, Strong room-ah kalh hnan mek niin DC Office Security Guard ten an veng mek a ni.

Vote chhiara Returning Officer te puibawm tur Counting Supervisor leh Counting Assistant te chu ruat fel vek tawh niin January ni 31, 2025 khan training pawh kalpui fel tawh a ni.

Election duty avanga mahni veng/polling station-a vote thlak thei lo turte chuan Persons on Election Duty form hmangin vote thlak dilna an siam a, PED hmanga vote thlak turte chuan nimin ni February ni 6, 2025 atang khan Saitual DC Office, Ngopa BDO Office leh Phullen BDO Office-ah te Facilitation Centre hawn niin vote an thlak a, a hnuaia tarlan hi nimina vote tlak dan a ni-

Category-I (Saitual District-a vote nei)

Saitual - 75
Phullen - 39
Ngopa - 31
Total - 145

Category-II (District danga vote nei)

Saitual - 61
Phullen - 31
Ngopa - 26
Total - 118

Grand Total = 263

District chhunga vote neite tan vawiin leh naktuk chawhma thleng vote thlak theih a la ni dawn a ni.

Inthlanna kaihhnawiha hman turin lirthei a hnuaia mi ang hian man an ni:

Security vehicle - Maxicab 7
Polling Party vehicle- Bus 3 leh Maxicab 52

Vawiin February ni 7, 2025 atangin Daido, N. Khawlek, Tuivai, Kawlbem-ah te NAKA check post kalpui tan a ni a. Surveillance cum Area Domination team te pawh vawiin atangin Suangpuilawn, Ngopa leh Saitualah an duty tan bawk a ni.

Inthlanna kalpui turin ni February ni 11, 2025 hian Polling Party te chuan Polling Station an pan chhuak tawh dawn a. Tun dinhmunah hian Saitual District-ah MCC (Model Code of Conduct) report a la awm lo a ni.

Vawiin Press briefing-ah hian Dr. Lalngura Tlau, DEO, Pi Marilyn Rualzakhumthangi , Observer, Pu Lalthakima Chhangte, EO, Pi F. Zodingpuii, DIPRO leh Saitual MJA member-te an tel a ni. January ni 17, 2025-a khan Press Briefing neih tawh niin, VC inthlan atana hmalakna hmasate thlir ho a ni tawh bawk a ni.