291/2025-2026
Saitual, the 23rd April, 2025: Vawiin chawhma khan DC Conference Hall, Saitualah, zirlai naupang zinga exam vanga rilru hahna awm thin chungchang inzirtirna- ‘District Level Orientation and Sensitization Programme on the issue of exam stress among children” chu Pariksha Parv 7.0 hnuaiah neih a ni a, Saitual Bawrhsap Dr. Lalngura Tlau chu khuallian niin he programme hi a hawng nghal a ni.
He hunah hian khuallian Dr. Lalngura Tlau chuan thu sawiin, India rama zirlai naupangte chuan exam pawimawh tak tak pawl 10 matric exam atanga college entrance exam te leh hna lakna exam thlengin an hmachhawn thin tih a sawi a, heng exam te hian an rilru hriselna nasa takin a nghawng thin a ni, a ti. Bawrhsap chuan zirlai naupangte chu exam an hmachhawnin, an inbuatsaih that loh vang te, hlawhchham an hlauh vang te, nu leh pa beiseina phak loh an hlauh vang te leh exam chauh rilruah an dah thin avang tein rilru hahna an neih phah thin tih a sawi.
Bawrhsap chuan zirtirtute leh nu leh pate chu naupang rilru hriselna kawngah mawhphurhna sang tak an nei tih a sawi a, naupang te chu an mizia leh tui zawng azir zela kai hruai turin a chah a ni. Naupangte chu an rilru leh taksa a lo hrisel zawk nan ina inkhung a, lehkha zir ngawr ngawr lo a, infiamna leh thil dang tuipui an neih a pawmawh a ni, a ti a. Dr. Lalngura Tlau chuan rinawmna leh taimakna nen chuan eng eizawnna kawngah pawh hlawhtlinna a awm a ni tih naupangte chuan an hriat a tul a ni tiin, vawiin programme chu an hlawkpui ngei theih nan kalkhawmte chu duhsakna a hlan nghal a ni.
Vawiinah Sensitization progamme hi Pu Micky. R Lalenkawla, DEO & DPC chuan a kaihruai a, powerpoint presentation hmangin kalkhawmte chu zirtirna a pe nghal a ni. He hunah hian District Bawrhsap Dr. Lalngura Tlau chuan thu sawiin, Saitual District-a zirtirtute leh zirlai nu leh pate an tel a ni.
