1928/2026-2027

Saitual, 25th August, 2026: Vawiin khan DC Conference Hall, Saitualah, District Level Committee on Celebration of Teachers’ Day 2026 chu an Chairperson, District Bawrhsap ni bawk, Pu Srinivas Sadi kaihhruaiin Zirtirtute Ni- Teachers' Day 2026 lawm dan tur relin an thukhawm.

He hunah hian Pu Laldingliana DEO, District Level Committee on Celebration of Teachers’ Day 2026 Member Secretary ni bawk chuan thu a sawi a, zirtirtute ni chu zirtirtute chawimawina leh an hlutna tihlanna hun pawimawh tak a ni, a ti. DEO chuan nikum lamah ropui taka lawm ni mah se senso a hautak avangin kumin chu mahni school theuhah hman ni se tih a sawi a, zirtirtute pualin hmun hrang hrangah banner tar a nih tur thu a sawi bawk.

Vawiin thukhawmah hian nikum lama Zirtirtute Ni hman dante thlirletna hun hman a ni a, kumina lawm dan turte rel a ni bawk. Zirtirtute Ni, September ni 5 chu Inrinni a nih avang leh September ni 4 (Zirtawpni) chu chawlh a nih avangin September ni 3 (Ningani)-ah school tinah mahni remchan dan anga lawm ni se tih rel a ni a, Saitual bakah Phullen leh Ngopaah te Zirtirtute Ni pualin banner tar ni se tih rel a ni bawk. Zirtirtute Ni lawmna niah hian Zirtirtute Ni puala thuchah “Teachers’ Day message” chu school tinah chhiar chhuah a ni dawn bawk a ni. National Foundation for Teachers' Welfare (NFTW) chu November thla ral hmaa khawn fel ni se tih a rel a ni a, NFTW hmang hian Saitual District-a zirtirtu dam lo thahnem tak kanna pek an ni tawh a ni.

Vawiin hun hmannaah hian Saitual District Level Committee on Celebration of Teachers' Day, 2026 member-te an tel a, District Bawrhsap chuan lawmthu sawiin hun a khar a ni.