No.2657/2020-2020

Lawngtlai, Vawkhniahzawn thla ni 2, 2020: Tukin zingkar khan Lawngtlai Press Club-ah Samagra Shiksha, Lawngtlai District chuan kum 2020-21 session atana sawrkar sikul, primary leh middle school-a zirlai naupang kum 6-14 inkarte tana a thlawna zirlaibu an sem tur chu an pe chhuak tan a. A hawn nan Lawngtlai Bawrhsap, District Education Committee Chairman ni bawk Dr Andrew H. Vanlaldika, MCS chuan hun a hmanpui.


Bawrhsap chuan zirna chu kawng tinrenga hmasawn nan thil pawimawh ber a nih thu sawiin, Lawngtlai District-a zirna siam tha turin theih tawp chhuaha tan lak a tul thu a sawi a. Education Department hnuaia thawktute chu tan la thar turin a fuih a ni. Zirna chungchangah naupang chu zirlaibu ngawr ngawr zirtir lo va, an nun atana an mamawh hrang hrang zirtir tel thin turin zirtirtu kal khawmte chu a chah a, naupangin an entawn ber chu zirtirtute an nih avangin an nun pawh uluk hle turin a chah bawk.

He hun hi Samagra Shiksha, Lawngtlai District-a District Project Coordinator (DPC) Pi R. Lalnunthari, District Education Officer ni bawk chuan a kaihruai a. Lawngtlai khawpui chhunga primary school headmaster kal khawmte hnenah Bawrhsap chuan an zirlai naupangte chan tur zirlaibu a hlan hlawm a ni.

Samagra Shiksha, Lawngtlai District hnuaiah hian Block 4 (pali) leh Cluster Resource Centre 19 (sawmpakua) a awm a, chumi hnuaiah chuan primary school 226 (zahnih sawmhnih paruk) leh middle school 155 (za sawmnga panga) a awm. Primary school-ah hian zirlai naupang 9493 (sangkua zali sawmkua pathum) an awm a, middle school-ah hian zirlai naupang 6820 (sangruk zariat sawmhnih) an awm bawk. He'ng zirlai naupangte hian sikul tan hmaa zirlabu an dawn vek theih nan ruahmanna siam a ni.

Attachment

  • Loading attachment...