Vawiin khan Pu Lal Thanzara, Health & Family Welfare Minister chuan Samaritan Society of Mizoram ten Silver Jubilee lawmna I&PR Auditorium-a an neih chu a hmanpui.

Minister chuan Samaritan Society of Mizoram-a thawktute chu midang te tana malsawmna ni tura theihtawp chhuah zel tura fuihin, midang tanpui nana sorkar rinchhana kal tum loa mahni thawhchhuah ngei hmanga midangte tanpui zel turin a chah a ni.

Pu Lal Thanzara chuan, thisen sawngbawlna man sorkar-in a lak chungchangah mirerthei ten harsatna an tawh dawn loh thu a sawi a. BPL member leh RSBY-a in ziak lutte chuan thisen sawngbawlna man hi an chawi ve a ngai dawn lo a ni a ti. Sorkar-in thisen sawngbawl nana Rs.1,500 lai a sen phuhruk nana Rs.550 lak chu a mamawh tu tan chuan a na lo hle a ni a ti a. Thisen mamawh tute hian sum an neih loh pawhin thisen hi pek zel tura thuchhuah an siam thu sawiin thisen sawngbawlna man chu sorkar damdawiin ten an lak hma pawhin private damdawiin ten an lo lak fo tawh thin thu a sawi a, thisen mamawh tuten thisen a tam thei ang ber an dawn theih nana thisen sawngbawlna man hi a san em avanga man tlem te chawia a man hi lak ve chauh a ni a ti.

Vawiina Samaritan Society of Mizoram ten Silver Jubilee an lawmna hun hi Pu C.Dinthanga, Executive Member, SSM in kaihruaiin, Pu Lalhrima Sailo, General Secretary SSM in report a pe a. Dr. N. Pallai, President SSM pawhin thu a sawi bawk.

Samaritan Society of Mizoram te hi Ni 15.01.1990 kum khan din tan a ni a, tanpui ngai te tanpui tih thupui hmangin tanpui ngaite tanpui hna an thawk thin a. Tunah hian Samaritan Society of Mizoram te hian Ruihhlo ngai leh HIV vei te tan tanpui hna nasa tak in an thawk chho mek a ni.