Samaritan Society Of Mizoram bultumin vawiin khan Chhimveng YMA Hall-ah Mamit khawpui leh a chhehvel khuate tan krismas thilpek atan thawmhnaw sem a ni a. He hun hi Pu H. Lianzela Addl D.C chuan hmanpuiin thilpek hlanna a nei nghal a ni.
Pu H. Lianzela Addl D.C Mamit chuan midangte tana luangchhuak thei tura Samaritan Society of Mizoram te hmalakna leh inpekna chu lawmawm a tih thu leh hetianga buatsaih anih theihna tura pawl leh mimal mi inphalte chungah lawmthu sawiin Lal Isua Krista kan tana a lo pianna hi thilthlawn pek a nih angin heng hunte midangte tanpui nana kan hmang thin chu thil lawmawm tak a ni ati bawk.
Thilpek dawngtu zawng zawngte pawh krismas leh kumthar hlimtaka hmang tur leh Pathian malsawmna changa, midangte tana luang chhuak ve thei tur khawpa hun kalzel turah malsawmna dawng turin duhsakna a hlan a ni.
He hun hi Dr N.Pallai President, SSM chuan a kaihruai a, Pu Lalhrima Sailo General Secretary SSM chuan an pawl hmalakna leh hetiang hun buatsaih thei tura an hmalakna chungchang a sawi bawk.
Samaritan Society Of Mizoram hi kum 1990 khan Mizoramah ding tanin dintirh anih atangin mi harsa leh chhuanchham leh kawng danga tanpui ngaite an tanpui thin a ni. Kumtin krismas dawnin chhungkaw harsa thawmhnaw leina nei lo YMA te’n an thlan chhuahte hnenah thawmhnaw an sem thin a . Kumin hian YMA te’n an thlanchhuah Mamit khawpui chhung YMA Branch paruk bakah a chhehvel khua Suarhliap, Damdiai, Vawngawnzo, Darlak, Bawngva, Nalzawl, Phaizau, Dampui leh N.Sabual khua atangin mi 700 vel tan thawmhnaw hi sem a ni.
