Ni thum awh tur Jugalbandi Sangeetotsav, Hindustani rimawi kutpui chu vawiin khan Art & Culture Minister Pu R.Romawia’n Vanapa Hall-ah a hawng. He rimawi kutpui hi Art & Culture Department leh Sangeet Natak Akademi, New Delhi tangkawp buatsaih a ni.

Pu R.Romawia chuan India ram hi hnam hrang hrang awm khawmna, culture leh folk music a hausa tak a ni, a ti a. Amaherawhchu, khawvel hmasawnna in a ken tel khawthlang tihdan leh nunphung lar chak em em chuan India ram a nghawng a, thalai tam tak chuan khawthlang zai leh lam an tuipui tawh tiin India ram hmun hrang hranga Jugalbandi Sangeetotsav kalpui hian Hindustani rimawi ngaihhlutna a chawh thawh a beisei thu a sawi a. He rimawi kutpui neih mek hian a ngaithlatute thinglungah India ram hmangaihna tuh se a duh thu Minister chuan a sawi bawk.

Jugalbandi Sangeetotsav hi India rama civil mite chawimawina sang ber Bharat Ratna lo dawng tawh leh Sangeet Akademi Fellow ni bawk Ustad Bismillah Khan hriatreng nana buatsaih a ni a. Vawiin chawhnu atanga tanin December 22 thleng nitin chawhnu dar 2:30 ah tanin he programme hi a duh apiang tan chhim theih a ni.

Guwahati atangin Hindustani rimawi tum thiam Hem Hazarika, Biswajit Roy Chaudhary, Nabin Rajkkonwar, Tarun Chandra Kalita, Bidyut Kumar Mishra leh Pankaj Sharma; Silchar atangin Amarendra Chakraborty, Pankaj Seal; Bishnupur atangin L.Brajakumar Singh, L.Lalhari Sharma; Agartala atangin Ashok Kumar Das, Babul Debnath, Debabrata Mallik leh Narayan Sarkar; Indore atangin Abdul Salam Naushad leh Sappu Khan, Mumbai atangin Soma Ghosh leh Varanasi atangin Sunil Prasanna te an rawn kal a. Anni hian Hindustani rimawi hmanrua - sitar, tabla, violin, flute, santoor, shehnai leh sarod te hmangin rimawi an tum dawn a ni.

Hawnna programme Art & Culture Director Pu R.Hmingthanzuala kaihhruaiah hian Padma Shree lo dawng tawh leh Sangeet Natak Akademi Awardee ni bawk Pu Lalthangfala Sailo chu khual zahawm niin Art & Culture Jt. Director Pi Carol VLMS Dawngliani chuan lawmthu sawina hun a hmang a ni.