Vawiin khan Sports & Youth Services Minister Pu Zodintluanga hovin a pisaah kumin kum 2016 chhunga SYS Department leh Mizoram State Sports Council (MSSC) hmalakna thlirho a ni a. He hun hi Parliamentary Secretary Pu Hmingdailova Khiangte chuan kaihruaiin, kumin chhunga International Games pathum medal latu Mizo Weighlifter Jeremy Lalrinnunga chawimawina hun hman nghal a ni.

Minister Pu Zodintluanga chuan inelna namai lo tak Commonwealth Games-ah Mizo thalai an tel ve mai piah lama Gold Medal hial dawng thei kan nei chu a lawmawm tak meuh a ni, a ti a. Sports discipline hrang hrangah hmasawnna siam turin Sorkarin hma a lak belh zel thu leh, kumin chhung ringawt pawhin hmasawnna ruhrel (infrastructure) siam belh kawngah project paruk zawh fel a hawn an ni thei chu a lawmawm thu a sawi a; heng hmalakna avanga khaw hrang hrang atangin tun hnaiah infiammi tha tak tak state in a neih thar belh zel thu a tarlang bawk.

Sports Minister chuan infiamna lamah Mizo ten talent tha tak kan neih hi belhchhah a, hlawhtlinna tak tak siam thei turin infiammi te mai bakah department leh council a thawk te chuan hmasawn zel kan tum tur a ni a, zir belh ngai leh insiamthat ngai kan neihah te pawh a tul angin kalphung tha zawk siam belh zel turin ke kan pen a ngai a ni, a ti a. Infiammi te zingah pawh eng discipline pawh lut se, thiamna tak tak leh kalphung (technique) dik hriat chian a zir zawh hma hauhva a behbawm dang – infiamna hmanrua leh thuamhnaw to tak tak emaw kan ngai pawimawh hmasa zawk fo hi a fuh chaihlo a ni, Minister chuan a ti a. Mihring thiamna, tumruhna leh teirei peihna chu hlawhtlinna siam turin a pawimawh hmasak ber thu a sawi.

Pu Hmingdailova Khiangte chuan Infiamna khawvelah state hrang hrangten Mizoram chu an chhoh en tawh thu sawiin, football mai bakah hockey-ah te pawh player tha zawnga Mizo thalai rawih tur hmun dang atanga rawn vaitu an tam thu a tarlang a ni. Vawiin hunah hian Pu C. Laltlanthanga, MSSC Secretary chuan kumin chhunga hmalakna report a pe a. Kumin chhunga Sports Infrastructure project zawhfel te chu Rs. 789 lakhs senga Mualpui a Multipurpose Indoor Hall sak (20.4.2016 a hawn), Rs. 175.55 lakhs senga sak Taekwondo & Powerlifting Hall, Republic Veng, Aizawl (26.6.2016 a hawn), Rs. 150 lakhs senga sak Zemabawk Judo Hall (26.7.2016 a hawn), Rs. 600 lakhs senga Kawnpui Boys Hockey Academy-a Hockey Astro Turf phah (27.9.2016 a hawn), Rs. 50 lakhs senga Thenhlum a Indoor Stadium sak leh Rs. 50 lakhs bawk senga Bunghmun a Indoor Stadium sak (25.11.2016 ve ve a hawn) te an ni a. Heng bakah hian NEC in a pawmpui tawh project pathum leh project 10 kal lai mek a awm bawk.

Kum 2016 chhungin sports intihsiakna hrang hrangah Mizo infiammi ten Gold Medal 118, Silver Medal 58 leh Bronze Medal 62 an la a. Heng zingah hian International Competition-ah Gold 31, Silver 12 leh Bronze Medal 11; National Competition-ah Gold 55, Silver 17 leh Bronze Medal 31; Regional Competition-ah Gold 32, Silver 29 leh Bronze Medal 20 lak a ni a.

Vawiina chawimawina pek Jeremy Lalrinnunga hian IWF World Youth Weighlifting Championship, Pennang, Malaysia a October ni 19-25 chhunga neihah Silver Medal a la a, Commonwealth Youth Weightlifting Championship, Pennang a neih ah bawk (25-30, October, 2016) khan Gold la in, chumi hnu November ni 8-16 chhunga Tokyo, Japan-a Asian Youth Weightlifting Championship neihah Silver Medal a la leh a ni.