Ram chhung hmun dangte rualin nimin khan Sangau, Lawngtlai District-ah India Indepence Day ropui taka hman a ni a. Minister Pu Nihar Kanti Chakma chuan Sangau II khelmualah hnam puanzar pawt pharhin Parade Contingent 15 te chibai buk a chhang let.

Minister chuan India ram zalenna ni champhaphakah ram tana nun hlantute leh zalenna sualtu ropui te zahna chibai bukin an inpekna rahchhuah dikna, zalenna, intluktlanna leh inunauna khua leh tui ten kan nei hi a lawmawm em em a ni, a ti a. Mizoram pawh ram puma State ralmuang ber ni tura Peace Accord a sign-na kum 25 lai liam tawhin he remna avang hian nasa takin ramin hma a sawn a ni, a ti. Minister chuan Mizoram sorkarin Look East Policy, Hydro Electricity, Rail kawng siam, thalaite infiamna, mi rethei khaichhuahna tur NLUP, tui thianghlim intur, Health Care Scheme leh kawng hrang hranga mipuite tana hmasawnna hna a thawh dan tarlangin mipuite tawiawmna a ngen a. A Department enkawl mek AH &Vety ah chuan chhungkaw 9837 te hnenah ranvulh tanpuina Rs.21,45,00,343 (cheng nuaih sanghnih za sawmli panga zathum sawmli pathum) pek a nih tawh thu leh Sericulture Department-ah Pangang khawitu chhungkaw 826 hnenah Rs. 3, 76,06,128 (cheng nuaih zathum sawmsarih paruk sangruk za sawmhnih pariat) pek a nih tawh thu tarlangin NLUP dawngtute chu rinawm leh taima taka an sum dawnte tangkai taka hmang turin a fuih a ni.

Minister chuan Chief Minister kaihhruaina hnuaiah State Disaster Management Policy leh thildang pawimawh tam tak duang tu State Disaster Mangement Committee din a nih thu leh District leh Block tinah District leh Block Level Committee din a nih tawh thu a tarlang bawk.

Pu Nihar Kanti Chakma chuan Sangau RD Block huamchhung tana sorkarin hmasawnna hna a thawh dan tarlang nghalin kum 2010-2012 chhungin IAY-ah retheite in sakna New Construction-ah 102, Upgradation-ah 22, SGSY-ah 9 SHGs, Individual 22 Swarozgaris, BADP hnuaiah Community Hall, Bazar Shed, Truck Road, Water Tanky leh thil dang cheng nuaih 100 senga siam a ni, a ti a. Chhungkaw 41 hnenah insakna tur rangva pek an nih thu sawiin 33kv substation pawh thawh zawh tep a ni a ti bawk. MGNREGS hnuaiah chhungkaw engemawzat inhlawhna siamsak a nih thu leh Sangau Greater Water Supply Scheme Phase-I pawh a hna zatve aia tam zawh a nih tawh thu Minister chuan a tarlang a. Sangau ICDS hnuaiah pawh Center building thar 5 sak zawh ni tawhin kum 80 chung lam mi 73 hnenah tar chawmna thla tin Rs. 500/- pek an ni a, Pianphunga rualbanlo mi 10 hnenah thla tin Rs. 200/- pek an ni, a ti bawk.

Independence Day lawmna inkhawmah hian Sangau mipuite an tel tha hle a. Lai Autonomous District Council atangin Chairman Pu F. Rohnuna, Adviser to CEM Pu Rualirha, Town Committee Chairman Pu L. Lawmkima leh MDC Pu K. Lalringa bakah Aizawl atangin AH &Vety Deputy Director Pu Jasper Rongura Sailo, Sericulture Asst. Director Pu Lalrozama leh IPRO Pi Lalnunmawii ten Minister Pu Nihar Kanti Chakma hi an tawiawm a ni.