Vawiin chawhma dar 10:30 khan Serchhip Field No. 2-ah Independence Day ropui taka lawm a ni a, Pu Zodintluanga, I&PR, SYS, UD&PA etc changtu Minister chuan khuallian niin a hmanpui. He India ram zalenna champha lawmna niah hian March Past Contingent 24 awmin SSA Pipe Band te leh Tae-Kwon-Do zirlai ten an thiam thilte an entir a, Independence Day pual Football tournament final pawh khelh nghal a ni.

Minister hian Independence Day lawmna hmun a thlen veleh hian India hnam puanzar a pawt pharh a, hemi zawh hian March past nei tur parade contingent 24 te chu endikin March past parade contingent te chibai buk a chhanglet nghal bawk a ni.

He ni lawmnaah hian khuallian chuan thu sawiin vawin hi zalen ram kan nih chhinchhichna ni ropui a ni a, zalenna chuan beiseina min pe a, chu chu kan hnam puanzar hian a entir a ni a ti a. Hetiang ni pawimawh leh ropuiah hian kan hnam hruaitu ropui tak tak, Pu Gandhi-a, kan India Hnam Pa te, Pu Nehru-a te leh Pu Lal Bahadur Shashtri kan hre reng a, an inpekna te leh hna thawh rah chu keini hian kan seng mek a ni a ti.
    
Minister chuan India ram zalen a nih hnua hmasawnna chi hrang hrangte sawiin vawiin niah phei chuan India chu khawvela dinhmun pawimawh ber luahtu te zingah a tel tawh a ni a ti a. Chutiang zelin Mizoramah pawh chak taka hmasawnna a kal theih nan ram mipui te himna leh zalenna hi sawrkar chuan a ngai pawimawh hle a, Modernization of Police Force Scheme te leh Crime and Criminal Tracking and Network System te hmangin Police te tha tihchak an nia. Economic Offences Wing leh Anti Human Trafficking Unit dinin sualna lo oung chho zel tur hmachhawn turin thuam chak zel a ni bawk a ni a ti.
    
NLUP chungchang pawh sawi langin Minister chuan NLUP chu tih dan hlui thlaka mi harsa zawk ten eizawnna ngel nghet an neih theihna tur programme a ni a, a dawngtu zawng zawngte pawhin hlawhtlinpui ngei tura an beih a tul thu a sawi a, he programme hi a hlawhchham a nih chuan miretheite chawikanna tur programme dang a vang hle tawh dawn a ni tiin official te pawh an hnathawh danah taima leh uluk turin a chah bawk.
    
Ama department enkawl te sawi langin Minister chuan Mizoram pum puiah mirethei in sakna neilote tan in tam tak a sa tawh a, Serchhipah pawh IHSDP atangin miretheite tan chenna in 350 lai sak mek a ni a ti a. UIDSSMT atangin Greater Serchhip Water Supply Scheme cheng nuai 687.60 man PHE department-in an thawh mek thu leh Auditorium leh Stadium Complex Rs. 3651.23 lakh man pawh July 2012-a zawh hman tumin an thawk mup mup reng a ni a ti bawk. Hei mai bakah hian Serchhip khaw chhungah hmasawnna hna hrang hrang thawh nan Social Infrastructure Development Scheme hnuaiah Rs. 2322.40 lakh ruahman a ni a, hemi hmang hian inkalpawhna step, retaining wall te leh community hall engemaw zat sak tur a ni a ti bawk.

Khuallian chuan sports lama hmasawnna pawh sawi langin 12th Finance Commission atanga vbc 24 hmanga Rajiv Gandhi Stadium, Mualpuia sak hna chak taka thawh mek te, State Sports Academy cheng vbc 17 man tender chhuah tura hma lak mek te, Kawnpui leh Thenzawla Boys leh Girls Hockey Academy vbc 5 leh 3.06 man te, Regional Sports Academy, Saidan buatsaihnan NEC atangin vbc 4.9 man kalpui mek te leh Indoor Stadium vbc 11.7 man leh 10.4 man Aizawl leh Champhaiah te sak mek a nih thu a sawi a. Tin, Mizo thalai ten a thlawna thlawhna khalh an zir theihna turin NCC Air Wing pawh kan nei tawh a, tun atanga rei lo teah kan thalai ten thlawhna khalh an zir tawh dawn a ni a ti bawk a. Mizoram leh India-in hma a sawn zel theihna turin mahni zawn theuha theihtawp chhuah zel turin mipuite a sawm a ni.

Minister hian March Past Parade contingent te hnenah hian lawmman a sem nghal a, a titha zualte chu :
Pakhatna – Little Flower Convent School
Pahnihna – Presbyterian Middle School leh Chawngbuangi Memorial Elementary School
Pathumna – Government J.M. High School leh Lal Thanhawla Higher Secondary School
te an ni a, parade contingent zawng zawng hnenah participation prize sem vek a ni.

Independence Day pual inkhawm zawh anih hnu hian DC’s at Home chu sawmbikte tan DC Bungalow ah neih a ni a, hemi hnu hian Minister hian Field No.2 a Independence day Football Tournament Final enin lawmman a sem nghal a ni. Final hi Serchhip Chhim Veng Sporting Club leh AWC Sporting Club ten khelin hun pangaiah 2-2 in an inhnehtawk a, hun pek belhah goal a awm belh theih loh avangin penalty shootout hmanga chak zawk zawn a ni a. Hetah hian AWC Sporting Club-in 3-2 in hnehna an chang ta a ni.