Vawiin hian Serchhip District Sanitation Task Force in a lo rel tawh angin Government Serchhip College a NSS leh Eco Club member 300 vel te nen Serchhip khawpui thli dawng lui pahnih Sesah lui leh Hmawngawn lui thenfai hnatlang neih a ni.

UD & PA Department hmalakna, khawpui fai inelna atana inbuatsaihna kawng khat, State Sanitation Task Force in a lo duan Cleaning of urban River Stream etc., component a Serchhip District in pawisa a hmuh te kalpui dan tur hi Serchhip District Sanitation Task Force chuan ngaihtuahin Serchhip khawpui thli dawng, khawpui chhung atanga tui luangchhuak ni bawk Sesah Lui leh Hmawngawn lui chu then fai ni se, tih leh hmalakna dang thenkhat  a rel a. He hmalaknaa mawhphur tur hian Pu Nengthianlal, MCS, SDC,  Pu K. Saitluanga, MIS, DIPRO leh Pi Vanthangpuii DUDO te chu a ruat a. An ni hian Government Serchhip College NSS leh Eco Club te chu phungbawmah sawm ve lehin vawiinah hnatlang hi an nei ta a ni. Zirlai hi 300 vel an thawk chhuak a, NSS Programme Officer pahnih Pu Laldingluaia Khiangte, Asst Professor leh Pu Chanchinthahrilmawia, Asst Professor ten NSS member te hi rawn hovin, Pu C. Lalramliana, Asst Professor, In-Charge, Eco Club in Eco Club lam a rawn ho bawk a. An ni kaihhruaina hnuaiah hian heng lui pahniha bawlhhlawhte hi uluk tak thenfai an ni a, DUDO Bawlhhlawh paih motor pahnih hmangin Serchhip Dumping Ground lamah phurh liam an ni. Tin, vawiin hnatlang hi Serchhip Cable TV lian TT Vision leh LALRO Digital ten full coverage an neih sak a, SCN leh DDK lam ten News Item turin an Cover sak bawk.

Heng lui pahnihte hi nikum lamah pawh hetiang chiah hian lo thenfai a ni tawh a, amaherawh chu vawiina an then nawn leh hian Bawlhhlawh a lo tam leh viau tawh mai a. Hei vang hian District Sanitation Task Force chuan heng lui pahniha lut thei tura bawlhhlawh paih reng reng a khap tih Serchhip mipui ten hre nawn tlang leh ila tha a ti hle a ni.

Tunah hian Mizoram khawpui fai inelna neih chhoh leh mek niin endiktute hi September thlaa midang hrilh lova a ruka an lokal rin a ni a, hei vang hian Serchhip mipuite faina lamah mahni theih ang tawka hma lo laa, chhungtinte mahni in leh a vel lo tifai tha turin District Sanitation Task Force chuan a ngen bawk a ni.