Vawiin chawhma khan Chief Secretary Pu Lalmalsawma kaihhruaiin Secretariat Conference Hall-ah Chite Lui chhanchhuahna atana hmalakna chungchang sawihovin AMC hotute leh sorkar department hotute leh Save Chite Lui Coordination Committee hruaitute an thukhawm a. Chite Lui chhanchhuahna leh siamthatna atana hmalak tawhte leh Chite Lui humhalh tura hmachhawpte an sawiho. 

He thutkhawmnaah hian Aizawl Municipal Corporation (AMC) Mayor hovin AMC hnuaia Special Committee on Anti-Littering leh Central YMA-te nen tangkawpin Aizawl khawpuia veng hrang hrangah Save Chite Lui Task Force din dan ngaihtuah nise an ti a. He Task Force hnathawh dan tur leh a sum senso tur chu AMC-ah leh UD&PA Department-ah thehluh nise an ti a, a estimate hi SIPMIU-a mithiamten buatsaih se an ti. 

Committtee chuan Aizawl Bawrhsap office-in a din District Level Committee on Save Chite Lui chu tangkai zawka hman dan kawng dap nise an ti a. Chite Luia check dam siam hna leh hoarding tar bakah dan lova bawlhhlawh leh leivung paihna hmun (vulnerable spot) hung hna chu Aizawl DC Office kutah an dah nghal a ni. 

Chite Lui kama dan lova paih leivung tlingkhawm chu hmang tangkaiin luidungah lirthei leh mihring kalna tur siamna atan hman dan kawng dap nise an ti a. Hemi chungchang sawiho tur hian AMC hotute leh a kaihhnawih sorkar department hotute inrawnkhawm se an ti a. Uar zawkin mipui inzirtirna (awareness) kalpui chhunzawm zel nise an ti bawk. 

He thutkhawmnaah hian AMC Mayor, Deputy Mayor leh Councillor engemawzat an tel a. AMC Commissioner, UD&PA Director, Aizawl DC Office aiawhte leh tlawmngai pawl aiawhte bakah Save Chite Lui Coordination Committee hruaitute an tel a ni.