Nizan khan Aijal Club-ah MEDMOC chuan Mizoram sumdawngte zinga mahni a bul tan leh mahni kutkawih a hlawhtling zualte chu - sector panga atanga thlangchhuakin chawimawina trophy, thuziak leh sumfai a hlan a. He hun hi Chief Minister Pu Lal Thanhawla leh a thawhpui Minister ten an hmanpui a ni.

Chief Minister Pu Lal Thanhawla chuan sumdawng hlawhtlingte chu a lawmpui thu leh eizawnna tam tak  midangte tana an siamsak vanga lawmawm a tih thu sawiin an hlawhtlinna chu Mizo thalai tam zawk te tan chonna ni se, phurna siamsak tu ni se a lawmawm hle ang a ti. Sumdawng hlawhtling thlanchhuah, chawimawi phu tak tak ten an hlawhtlin chhanah 'ulukna - thilsiam, thil hralh leh nitina mipui dawrnaah' an sawi deuh vek chu Chief Minister chuan a thil awih zawng tak a ni tih a saw. Amah ngei pawhin a thusawina tam zawkah te chuan Mizoram sumdawngten midang te elpha turin 'quality' an dah pawimawh ber a tul thu a auchhuahpui thin tih a sawi a. "Mizoram hi nakin lawkah KMMTP kawngpui leh ramri sumdawn tawnna te avangin Gateway for Trade and Commerce with South East Asian Countries a ni thuai dawn a; chumi hunah chuan opportunities tam tak a awm dawn a. Chung remchanna leh huntha te chu hnamdang mite vanneihnaah a chan kan phal thei lova; chuvangin Mizoram chhunga opportunities tam tak lo awm tur hi ram leilungfate'n an neih vek theih nan entrepreneur tam zawk kan mamawh a ni. Chutiang tur chuan NEDP hnuaiah MEDMOC pawh -  a phur, a ngaihna hria leh hlawhtlin tum te tan a inhawng mek a ni. Entrepreneurship hi Mizoram hmasawnna tura kan innghahna, sawrkar hna hmulo singtel tana eizawnna siamsakna leh kuthnathawktute kutchhuak peipunsakna remchang a ni", a ti. Chief Minister Pu Lal Thanhawla chuan MEDMOC in an chawimawi mihlawhtlingte chu an mahni ang midang tamzawk chher tur leh tuna an sumdawn mekna te pawh manto taka hralh theih, 'Brand Name' a siam turin a fuih a ni.

MEDMOC Mizoram Outstanding Entrepreneurs' Award(MOEA) programme hi ZIDCO in a buatsaih niin Chief Secreretary leh MEDMOC Chairman ni bawk Pu Lalmalsawma'n a kaihruaia. Planning Minister Pu Lalsawta, Commerce & Industries Minister Pu H. Rohluna, State Planning Board Vice Chairman Pu H.Liansailova leh ZIDCO Chairman Pu Lalrobiaka te chu khualzahawm an ni.

MOEA 2007 hian sumfai Rs 40,000/-, chawimawina trophy leh Chawimawina thuziak te a keng a, kumtin buatsaih chhoh tum a ni. He lawmman hi  Manufacturing Sector- Mipa category-ah Pu K.Lalvuana, Kelvi Internationals  leh hmeichhe  category-ah Pi Lalsangzeli, Vakiria Institute of Fashion Technology; Service Sector - mipa zingah Pu H. Ginzalala, P & V Eastern Engineers leh hmeichhe zingah Pi Rosy Lalrempuii, Irene Spa;  Franchise Sector-ah Dr Franklin Lalrinngheta, Abigail the Home Store, Louise Phillipe store, Mahindra Motors Bawngkawn, Timothy's, Wills Lifestyles store, etc.; Social Entrepreneurship Sector-ah Pu R.Ramhmangaiha, Hnamchhantu Pawl leh; Innovative Sector-ah Pi Lalmuankimi, KC Facepack ten an dawng a. Lawmmna dawngtute hi thusawina huntawi pek an ni a. Lawmman dawngtute chuan an thawhrimna hriatpuina hun sawrkarin siamsak nachang a hria chu lawmawm an tih thu leh phurna nasa lehzual a pek thu an sawi a. An hlawhtlin chhanah thawhrim, rinawm leh quality humhim reng a pawimawh thu an sawi a. Thangthar zingah sawrkar atanga dawn vek leh sawrkarin a tihsakna lam rilru a awm chho mek chu thil pawi tak a nih thu an sawi a. Mahni kutkea dinchhuah tumna, mahni a bultan dan kawng dap tumna leh ram tan leh midang tan enge tihsak ngai tih lam ngaituahna chu Mizoram hmasawnna tur a ni tih an thusawiah te an tarlang a ni.