Nimin khan Agriculture Department, Lunglei District buatsaihin Huisih Zau, Haulawngah buh seng pui neih a ni a. Agriculture Department hnathawkte bakah sawrkar official dangte leh helai hmuna leilet neitute thahnem tak an tel a ni.

Huisih Zau-a buh seng pui neih pual hian a hmunah inkhawm tawi neih a ni a. He inkhawm Pu Ngurrinsanga Sailo, SDAO kaihhruaiah hian Lunglei District Agriculture Officer Pu C. Lalnithanga chuan thu sawiin helai hmuna loneituten sawrkar hmalakna taima tak leh phur taka an tawiawm thin avangin an chungah lawmthu a sawi a. Agriculture Department staff-te leh loneituten inhriatthiam tawnna boruak tha hnuaia an thawk ho zel thei chu lawmawm a tih thu sawiin kuthnathawktute dinhmun chawikang turin sawrkarin hma a la chhunzawm zel dawn a ni, a ti bawk.

Pu Vanlalruata Hnamte, Gram Sevak-in report pe in helai hmuna hna an thawh dan leh an hmalakna tlangpui sawifiahna hun a hmang a. Huisih Zau ah hian chhungkaw sawmhnih (20) in hectare sawmpanga (15) a zau ah leilet an siam a, kum khatah buh tin 3500 atanga 4500 vel an tharchhuak thin tih a tarlang a. Kumin chhung hian Huisih Zau loneitu te hnenah thlasik thlai chi (seeds) sem tura ruahmanna siam mek a nih bakah Sawrkar laipui policy Pradhan Mantri Krishi Sinchai Yojana (PMKSY) hnuaiah an hman tur tanky panga (5) buatsaih mek a ni bawk a. Helai hmun panna Link Road hi 2014 khan Rashtriya Krishi Vikas Yojana (RKVY) Scheme atangin siam that a lo ni tawh bawk a ni.