Vawiin chawhma dar 10:00 khan DC Conference Hall, Serchhipah Village Level Child Protection Committee te tan hmalak dan tur leh an hnathawh dan tur inzirtirna hun Orientation Training neih a ni a, Pi Sangchhin Chinzah, District Bawrhsap chuan khuallian niin a hmanpui.

Bawrhsap chuan thusawiin, kan ram leh hnam kal zelna atana naupangte hi an pawimawh hle ani a ti a. Tunlai hian naupang chunga hleilenna thleng hriat tur a awm ta fo hi a pawi hle a, nu leh pate kan inthlahdah tak avanga heng thil hi hluar ta nge anih a, tunhma pawha thleng fo thin, kan khawsak phungte kan inhriatpawh tak zung zung avanga hre tam ta nge kan nih tih erawh ngaihtuah tham tak a ni, a ti bawk.

Kan fate chunga thleng atana kan duh hauh loh thil tam tak naupang pawisawi lote chunga a thleng ta fo mai hian mawhphurhna pawimawh tak leh tih tur tul tak kan neih zia a ti lang chiang hle ani a ti a. Tuna naupangte atang hian kan ram hmel a lo la lang dawn ani tih hriain, keini hian kan naupangte nun hi ka venpui a, kan ngaihtuah hi a tul tak zet a ni a ti bawk.

Pi Lalsiampuii Tochhawng, District Child Protection Officer pawhin thu sawiin, Village Level Child Protection Committee (VLCPC) din anih dan leh an hnathawhte a sawi fiah a. VLCPC hi Integrated Child Protection Scheme hnuaiah, khaw tin leh veng tina naupang venhimna kawnga hma la turin ni 22^nd July, 2016 khan Mizoram puma khaw tin (Village Council/Local Council) awmna ah dih vek a ni a ti a. Serchhip District ah hian VLCPC 50 din anih tawh thu a sawi bawk.

VLCPC te hi an huam chhung theuhah naupang enkawl leh venhim ngaite leh naupang dan kalha chete emaw thil sual ti an lo awm chuan an chungchang lo ngaihtuah a, hma lo latu tur an ni a. Child Welfare Committee, Juvenile Justice Board leh District Child Protection Unit te nen thawk hova, naupang venhimna atana theihtawpa mahni veng leh khua theuha thawktu tur te anih thu a sawi bawk.

District Child Protection Unit, Social Welfare Department, Serchhip hian VLCPC training hi 2016 atang khan an kalpui tan a, Serchhip Town Area leh Thenzawl leh a chhehvel khua te tih loh chu an khuaah kalchilhin training hi pek vek an ni a, VLCPC 50 zingah khaw 5 chauh training pek hmabak an nei tawh ani.

He hun hi Pi R. Lalramdinmawii, Protection Officer, District Child Protection Unit chuan a kaihruai a, Pi Lalsiampuii Tochhawng, District Child Protection Officer, Pi Liansangpuii, Protection Officer (INC) leh Pi Lalramsiami Sailo, Legal cum Probation Officer ten zirtirna pe in, a lem nen an entir a. Serchhip khawpui chhunga VLCPC memberte an kal tha hle a, Pi R. Lalbiakhlui, Social Worker chuan lawmthu sawiin he hun hi a khar a ni.