Central Sorkar enkawl, Central Mechanical Engineering Research Institute (CSRI – CMERI), Durgapur, West Bengal leh Mizoram Resource Development Society Ltd. te tanghova sawhthing leh aieng sawngbawlna, cheng nuai 60 senga din chu Lengte Export Promotion Industrial Project (EPIP) hmunah nimin (18.03.2014) khan Pu Lalbiakthanga, Director, Industries Department chuan a hawng.

Pu Lalbiakthanga chuan hetiang khawl tangkai, loneitute thawh chhuah man man zawka hralh theihna tur siam anih hi lawmawm a tih thu a sawi a. He huna Khualzahawm Dr. P. Palroy, Director, CMERI, Durgapur chuan Mizo loneituten ram leilungin a zirloh vanga an thawh rim phu tawk an hmu let lo fo thin chu pawi tiin, an harsatna chu engemaw chenin he khawl hian a sutkian sak theih a beisei thu leh, a dang pawh bun belh zel dan ngaihtuah mek a ni, a ti.

Khawl thar hi CSIR 800 Mission Programme-in India ramchhunga loneitu maktaduai 800 te dinhmun tihhmasawn nana scheme kalpui mek hnuaia siam a ni a. Sawhthing leh aieng silfai, chan sawm, hem rona leh rawt dip hna chu he khawl hian thawk vekin, hun leh tha tam tak an hlep thei dawn a ni.