Sawrkar laipuiin Novel Coronavirus (COVID-19) darhzau zel tur laka invenna tura office memorandum a chhuah bawhzuiin General Administration Department, Government of Mizoram chuan Mizoram sawrkar Department/hnathawk zawng zawng leh Mizoram chhunga Public Sector Undertakings zawng zawngte zawm turin a hnuaia tarlan ang hian inven fimkhurna tura thurawn a chhuah a, hei hi Sawrkar hnathawkte hriselna leh himna tur a nih bakah mipuite hriselna leh himna tur a ni tih hre turin a chah bawk a ni.
1. Sawrkar office/building luh dawn ah hand sanitizer emaw, kut silfaina hmanraw pawimawh dah ngei ngei tur a ni. Hritlang khawsik reng reng chu sawrkarin inenkawl dan tur a ruahman angin tha taka inenkawl/inkhunghrang nghal tura hriattir tur a ni.
2. Office huamchhungah pawn lam mi lut lo turin theihtawp a tan lak tur a ni a, visitor/temporary pass semchhuah thin pawh tihtawp nghal tur a ni. Office dawr tur te chu an va hmuh tur officer hnen atanga phalna nei sa kher lo chu luh tir loh tur a ni a, hei pawh hi uluk taka endik (screening) hnu ah chauh phal tur a ni.
3. Meeting reng reng a theih chin chinah Video conferencing hmanga tih tur a ni a, a tul tawpah lo chuan mihring rual tak telna tur meeting te sawn hlat emaw, mihring tel tur tih tlem emaw tur a ni.
4. Puipunna leh huau huau hmunah kal loh tur.
5. A tul tawpah lo chuan official programme a zin loh tur a ni.
6. Inbiakna/indawrna pawimawh reng reng chu lehkha hmang lova, official e-mail emaw electronic means dang hmangin emaw kalpui hram tum tur a ni.
7. Lehkha (dak) pawimawh leh file dawn tur reng reng chu office building/room luh dawnah a dawnna hmun siam hram hram tur a ni.
8. Sawrkar building a intihhlimna/inkawmhlimna hmun/room awm zawng zawng chu khar vek tur a ni.
9. Hnathawhna hmun, a bik takin mihringin kan khawih tam deuhna hmun reng reng chu uluk taka silfai/tihfai reng tur a ni.
10. Washroom/inthiarnaah hand sanitizer, sahbawn leh tui (running water) hnianghnar tawk dah reng tur a ni.
11. Official zawng zawngte chu an hriselna ngaipawimawha invawng uluk tur leh thawk lama harsatna, khawsik leh nuamsamlo an awm leh awm loh ngaihven reng a, chutiang an awm chuan an hotu (reporting officer) hriattir a, office/hnathawhna hmun chhuahsan tir vat tur a ni a. MoH&FW, Government of India in inkhung hran (home quarantine) dan tur a ruahman chu an zawm nghal tur a ni. He inkaihhruaina hi MoH&FW website mohfw.gov.in/DraftGuidelinesforhomequarantine.pdf. ah download theih in a awm.
12. Leave pe theitu (leave sanctioning authority) reng rengin mahni inkhunghrang (self-quarantine) duh a leave la duh an awm chuan inven fimkhur nan leave pe tura thurawn pek an ni.
13. Sawrkar hnathawk zingah COVID-19 vei awlsam bik a ngaih (higher risk) – kum upa leh natna benvawn nei, damdawi hmanga inenkawl mek te chu fimkhur lehzual tura hriattir an ni a. Department/Controlling officer ten an hnuaia thawkte zingah home quarantine ngai awm ni a an hriat chuan Special Casual Leave ni 30 (kum khat chhungin) emaw sawrkar ruahman dan ang angin an pe thei ang.
