DIRECTORATE OF INFORMATION & PUBLIC RELATIONS, Government of Mizoram, India

4474/2024-2025

Aizawl, the 28th February 2025 : Vawiin khan Cultural Centre-cum-Auditorium, Vaivakawn-a National Health Mission (NHM) programme buatsaihah kum 2023-2024 FY leh 2024-2025 FY chhunga Sawrkar damdawi in ṭha leh felfai inelna – Kayakalp-a tiṭhate hnenah lawmman sem a ni. He lawmman semna hun hi Health Minister, Pi Lalrinpui chuan Khuallian niin a hmanpui a, lawmman semna hun hi Dr. Eric Zomawia, Mission Director, National Health Mission (NHM) – Mizoram chuan a kaihruai a ni.

Thuchah sawitu Health Minister Pi Lalrinpuii chuan Kayakalp-in a tum ber chu faina a nih thu sawiin, Mizoram chhunga damdawi in hrang hrang, Sub-Centre atanga PHC, District Hospital thleng a tlawh hnem tawh a, hengah hian Kayakalp hi a hlawhtling hle a hriat a ni a ti a. District Hospital atanga sub-centre level thlengin Medicinal Plants garden neih tur a nih chungchangah mipuite tana a tak taka a tangkai zawk theihnan Ayush Directorate lam nen pawha convergence tha zawk awm thei se a duh thu a sawi bawk.

Kayakalp lawmman dawng zawng zawng te a lawmpui thu sawiin, lawmman dawng ve ta rih lo damdawiin an la awm a nih chuan nasa lehzuala tan la turin a chah a, Special Awards hrang hrang hrang siam a ni chu thil tha tak a ni, tiin a phute chawimawi hi kan tihtur dik tak a ni, a ti.

Minister chuan NQAS leh Kayakalp Checklist te țha taka kan hlen chhuah hian kan service pawh quality zawk leh țha sawt tur a beisei kan ni a. Heng zawng zawng kan tih chhan ber mipui leh damlo te kan enkawlna kawngah hmasawnna a awm ve siloh chuan awmzia a nei dawn lo a ni, a ti a. Kayakalp leh NQAS laimu ber te zinga mi chu Hawihhawmna a nih vangin damlo damdawi in rawn pan tu te reng reng hawihhawm leh rang taka lo buaipui zung zung tur leh enkawlna dik an mamawh ngei an dawn theihna tur a hma la thin turin a chah a ni.

“Kayakalp” hi faina kawnga Sawrkar damdawi inte inelna niin, endikna tur duansa (checklist) hmangin chhawng thuma endik vek an ni a – damdawi in leh a chhehvel felfai taka an enkawl danah te, damdawi in aṭanga bawlhhlawh chhuak thliar hrana natna hrik inkaidarh lohna tura sawngbawl hnua a paihna hmun dik taka paih a nih dan te, thawktute’n an hna bil ṭheuh an thiam dan te, damlote ngaihdan lakna (patient satisfaction survey) te, khawtlang nena faina kawnga an thawhhona te leh eco-friendly lama an hmalakna te endik an ni.