3223/2024-2025

Dates Hnahthial the 27th November, 2024: Vawiin chawhma dar 11 khan Hnahthial DC Conference Hall-ah District Agricultural Marketing Committee (DAMC) Chairman leh Hnahthial District Bawrhsap ni bawk, Pi Rita Lalnunmawii Pachuau kaihhruaiin Bana Kaih Scheme hnuaia Hnahthial district chhunga Societies te tana an hriat tur tul inhrilhhriatna hun - "District Sensitization of Societies on Thlai Thar Marketing under Handholding Scheme, 2024" chu neih a ni.

Bawrhsap chuan Handholding Scheme hi sawrkarin kut hnathawktute dinchhuahna tur atana a duan anih ang ngeia hman chhuah anih theih nan a pawimawh berte zing ami chu kalkhawm hote chu an nih thu sawiin he huna Primary Collection Centres (PCC) enkawltu tur societies kalkhawmte chuan he Sensitization programme a an zirchhuah te chu he scheme a hlawhtlin ngei theih nan hmang tangkai thiam turin a chah a. Mizorama lo neitute buaina ber thin chu thlai thar chhuah tlem ai mahin a hralhna (market) anih thin thu sawiin chumi buaina tikiang tur chuan dik tak leh tha taka thawhho puiah societies kalkhawmte chu a sawm a ni.

Pu Isaac Laremruata, Co-opted member, DAMC chuan he hunah hian khaw tina lo neitute in tel khawm- Societies te mawhphurhna leh tihtur - Roles and Responsibility of Society bakah society te kal zel dan tur chungchang zirtirna neiin zawhna leh chhanna hun hman nghal a ni a. Societies te tana sum ziahfel leh vawn that dan tur - Account and Book keeping chungchang inzirtirna Pu K. Malsawmdawngliana, Co-operative Audit Officer, Lunglei chuan he hunah hian a nei bawk a ni.

Hnahthial District-ah hian PCC a thlai thar dahkhawmte chhun luhna hmun tur, Secondary Collection Centre (SCC) hmun li awmin chungte chu cluster tia then hran an ni a. Cluster hrang hrang atana Office Bearer turte he hunah hian Pu MS Dawngliana, DAO kaihhruaia thlan nghal niin Cluster tina Society OB thlante chu a hnuai ami te hi an ni:-

1. Hnahthial Cluster :
Chairman : C.Thanzauva
Vice Chairman : Zaliana
Secretary : H. Vanlalliana
Treasurer : K.Lalropuia

2. Darzo Cluster:
Chairman : FC Lalnghinglova
Vice Chairman : Pu. Lalbuatsaiha
Secretary : Joel Vanlalchhunga
Treasurer : K. Dinsangliana

3. Chhiphir Cluster :
Chairman : PC Lalliana
Vice Chairman : Lalthuthlunga
Secretary : Zothanpuia
Treasurer : PC Rongura

4. Cherhlun Cluster:
Chairman : FJ Tumsanga
Vice Chairman : H Tumsanga
Secretary : H. Rinzuala
Treasurer : J. Lalmuanpuia

Heng Cluster tin OB te hian an cluster theuh chhungah committee member 10 aia tam lo an lo ruat ve leh dawn a ni.

He Sensitization programme hi Pu Lalthakima, DHO chuan lawmthu sawinain a khar a ni.

Society tih hi sawrkarin thlai thar lei buaipuitu tura a pawm, a tlangpui thuin lo neitu intelkhawmte an ni a. Village Council pakhat tan Society pakhat zel thlan an ni. Primary Collection Centre(PCC) kan tih ve thung chu khaw tina thlai thar hralh tur ten an thlai thar an dahkhawmna tur leh hralhna tur hmun a ni a. Hemi PCC a chhungluh hi Secondary Collection Centre (SCC) ah chhungluh leh a ni ang. SCC hi thlai thar dahkhawmna leh hralhna hmun (auction centre) tur niin thlai tharte SCC a hralh anih loh chuan Support Price pek theih an ni lovang.

He scheme hnuaia luh leh PCC a thlai thar chhunluh hi intihluihtir theih a ni lova. Lo neitu ten an duh chuan mimalin an zuar thei tho ang. Amaherawhchu chutiang anga hralh te tan chuan support price a awm ve lo thung ang.