3224/2024-2025

2024 Sahmulphah thla ni 27: Photo electoral roll special summary revision (SSR) 2025 kalpui mek chungchangah vawiin khan Electoral Roll Observer Pi Zodingpuii IAS, Secretary, Food, Civil Supplies & Consumer Affairs Department chuan Lunglei tlawhin, electoral roll en nawn kalpui dan a enfiah.

Election Officer pisaah photo electoral roll special summary revision 2025 chungchangah hian ṭhut khawm buatsaih niin, Electoral Roll Observer bakah, Election Officer, DIPRO leh District MJA President te an tel a. Election Officer Pi R. Lalrinzuali chuan Lunglei District chhunga draft electoral roll dinhmun leh special summary revision neih meka hma lakna tlangpui a sawi fiah a. SSR kalpui mek puanzar kawnga an hma lakna leh SVEEP kal tlanga an hma lakna hrang hrangte a tar lang bawk a. Roll en nawnnaah chuan dilna lut chu online leh lehkha ziak (manual) a inpawlh (hybrid mode)-a kalpui a nih thu sawiin, tun dinhmunah AERO-te an bialah hearing neia an chhuah mek thu te, dilna 1,900 vel dawn a nih tawh thu leh a pum puiah dilna 3,000 vel a luh beisei a nih thu te a sawi bawk.

Electoral Roll Observer Pi Zodingpuii chuan Election Commission of India (ECI)-in roll en nawn chungchanga tih tur a tih angte Lunglei District-ah ṭha tak leh dik taka kalpui a ni chu lawmawm a tih thu sawiin, official-te ṭhahnem ngaihna leh political party leh tlawmngai pawlte thawhpuina azarah electoral roll dik leh felfai tak a awm a beisei thu a sawi a. Mihring inhmaizah avanga dik tawk lova inthun a awm loh nan khauh leh fimkhur a ṭul thu sawiin, kum tling chin roll-a thun ngai kim taka thun an nih theih nan te, a chuang lo tur an chuan palh loh nan te, paih ngaite pawh dik taka paih an nih theih nan leh awm hmun sawn chungchangah te pawh roll en nawn chu uluk taka kalpui chhunzawm zel turin mawhphurtute chu a chah a ni.

He hunah hian Electoral Roll Observer chuan Lunglei District-a SSR 2025 kalpui meka lehkha pawimawh en fel ngaite a en fel nghal a. Electoral roll dik leh felfai tak a awm theih nana thil pawimawh leh rawtna hrang hrangte sawi ho a ni bawk.

Electoral Roll Observer Pi Zodingpuii hi District Election Officer Pi Navneet Mann nen pawh a pisaah an inkawm bawk a ni.

Special summary revision, 2025 kalpui mekah hian draft electoral roll chu October ni 29, 2024 khan tihchhuah niin, Lunglei District-a assembly bial paruk - Lunglei North, Lunglei East, Lunglei West, Lunglei South, Thorang leh West Tuipuiah vote nei mipa 50,037 leh hmeichhia 50,965, an vaiin mi 1,01,002 an awm a. India khua leh tui kum 18 tling chin, January ni 1, 2007 leh a hma lama piang electoral roll-a inziah luh thar, paih, insawn leh siam ṭhat duhte tan November ni 28, 2024 thleng dilna hun hawn a ni a. January ni 6, 2025-ah final electoral roll chu tar chhuah tura ruahman a ni.