3225/2024-2025

2024 Sahmulphah thla ni 27: Lunglei District Deputy Commissioner (Bawrhsap) thar Pi Navneet Mann chuan vawiin chhun khan Lunglei DC Conference Hall-ah Mizoram Journalists' Association (MJA) Lunglei District member-te nena inhmelhriat nana inkawm hona leh thingpui in hona a buatsaih a. Bawrhsap hi Additional DC pahnih - Pu James Miahlung leh Pi Rochuangkimi Khenglawt te leh Lunglei District Information & Public Relations Officer (DIPRO) Pu C. Lalhruaitluanga te'n an ṭawiawm a ni.

Lunglei Bawrhsap Pi Navneet Mann chuan Lunglei District hmasawn nan te, mipui vantlang tan leh kut hna thawktute hmakhua ngaia theih tawp chhuah a tum thu sawiin, chumi a hlawhtlin theih nan chuan chanchinbu mite leh mipuite thawhpuina leh ṭawiawmna a ngen a. Mizoram chu a hmunhma leh boruakah nuam a tih thu leh mipuite pawh nelawm leh fel a tih thu sawiin, District dinhmun leh mamawhte zir chiang hmasa a, a ṭul ang zela hma lak a tum thu a sawi a. Hriselna, zirna leh kut hna thawh lam tihhmasawn chu a ngaih pawimawh hmasak a nih tur thu sawiin, bawlhhlawh sawngbawlna chungchang leh faina lamah te pawh theih tawp chhuah a tum thu a sawi a. MJA member-te chu amah bengvar a, finchhuah a, thurawn pe ṭhin tura sawmin, an ngaihmawh zawngte pawh a hnena thlen hreh lo turin a chah a ni.

He hunah hian MJA member-te chuan Lunglei District leh Lunglei khawpui enkawlna kawnga an ngaih pawimawh zawng thil hrang hrang leh mipuite mamawh hrang hrang an hriatte chu Bawrhsap hi sawipuiin, hma lak ho dan tur te sawi ho a ni a. MJA Lunglei District President Pu Laltlanthanga chuan DC tharin a hun remchang hmasa berah MJA te tana hun a buatsaih chu lawmawm an tih thu sawiin, District MJA te'n DC thar an lawmna thu a sawi a. District MJA te'n DC hmasate leh sawrkar department hrang hrangte ṭha taka an lo thawhpui tawh ṭhin angin DC thar pawh chu ṭha taka thawhpui an tum thu sawiin, DC-in a mamawhna zawnah biak leh koh theih maia an inhawn tur thu a sawi bawk.