4175/2023-2024

Dated Aizawl, the 15th March, 2024: Tukin khan Public Works Department Minister Pu Vanlalhlana leh Power & Electricity Department Minister Pu F. Rodingliana te chuan tun sawrkar flagship programme hnuaia thlai thar dah thatna tur atan Zuangtuia PWD, Commerce & Industries leh P&E Department hmunhma enfiahna an nei.

Minister-te chuan sawrkar-in Handholding Policy hnuaia thlai chi hrang hrang pali a dah - Sawhthing, Aieng, Hmunphiah leh Hmarchate chu rei zawk dah thatna tur atan an department hnuaia hmunhma hrang hrang enfiahna neiin, rei zawk dah that dan tur, dry storage leh process anih theih dan tur te an sawi ho. Thlai dah thatna atan hian hmunhma hrang hrang- PWD Mechanical Sub Division-II Workshop te, Bamboo Processing Factory Industrial Estate-te, Common Facility Centre-te leh P&E department hmunhma hrang hrangte chu tangkai taka hman anih theihna turin thlithlaia, enfiahna neih a ni.

He hunah hian Dr. KC Lalmalsawmzauva, Adviser to CM (Implementation of Handholding Policy), Pi Sangchhin Chinzah, Secretary, Commerce&Industries, Pi Florence Zotluangpuii, Director, Commerce&Industries bakah PWD leh P&E official ten an tawiawm a ni.