No.1016/2020-2020

Vawiin khan Mizoram Chief Secretary Pu Lalnunmawia Chuaungo kaihhruaiin Mizoram Sawrkar hnuaia Association hrang hrang 87 aiawhten ATI Conference Hall, Aizawlah COVID-19 kaihhnawiha sawrkar hnathawkte sum thawh tur chungchang a tum hnihna atan an rel.

Darkar thum chuang awh he meeting-ah hian meeting kaihruaitu Chief Secretary Pu Lalnunmawia Chuaungo chuan member kal zawng zawngte zalen taka an ngaihdan tlang taka sawi turin hun a pe a. Association hrang hrang aiawh kalkhawm atang hian mi 43-in thu an sawi a ni. Duhdan leh rawtna hrang hrang engemaw zat chhawp chhuah a ni a. Zau taka sawihona hun hman a nih hnuah sawrkar hnathawkte sum thawh tur chungchang chu Service Association theuh te leh mimal kutah dah nise, tiin thu tihtluk a ni. Chief Secretary chuan Service Association ang a ni emaw, mimal ang pawha COVID-19 dona atan leh hripui leng mekin a nghawng Mizoram sum leh pai dinhmun siamthatna tura mahni duh thu ngeia sum thawh duhte tan sawrkar a inhawng reng a ni, a ti.

Pu Lalnunmawia Chuaungo chuan COVID-19 donaa a hmatawnga tang Health Deparment, Police, mipui nitin mamawh ngaituahtu Supply Department leh a kaihhnawih department dangte, sanitation workers te, bawlhhlawh paih motor khalhtute, District Administration-a thawk te, mipuiin kan hmuh loh leh hriat phak loha lockdown lai pawha nasa taka thawktu sawrkar hnathawkte hnenah lawmthu a sawi a. COVID-19 dona atana sum thawh chungchangah pawh sawrkar hnathawkten CM Relief Fund-ah te, Local leh Village Level Task Force ah te, thenawm khawveng harsa tanpuina kawngah te sum tam tak an thawh tawh tih sawiin tlawmngai pawl, kohhran, sawrkar hnathawk leh mipuite tanrualna avangin tun thlengin Mizoram chu COVID-19 lakah kan la him a ni, a ti.