Mizoram a Republic Day champha vawi 67-na lawmna inkhawm lian ber chu Aizawl Lammual ah January 26 khian neih a ni leh dawn a. He hunah hian Mizoram Governor Lt.Gen(Rtd.) Nirbhay Sharma chuan India hnam puanzar pawtpharh in Republic Day thuchah sawina hun a hmang ang.
He ni pawimawh tak lawm tur hian Mizoram chhunga cheng, India khua leh tui zawng zawng te chu sawm an ni a. Sawrkar hnathawk te phei chu Republic Day lawmnna inkhawm ah hian tel ngei turin Sawrkar thuchhuah kaltlang a hriattir an ni.
January 26 hian zing ni a chhuah veleh sawrkar pisa leh sawrkar hmun pawimawh ah te Hnam Puanzar zar theih a ni ang a, mimal chenna inah te pawh zar theih a ni bawk ang. He tih hun chhung tho hian sakhaw hrang hrang vuan tu te zawng zawng chu, ram pumpui tan leh ramhruaitute tana tawngtai theuh tura ngen an ni.
Aizawl khawpui chhung bik ah Republic Day lawmna kalpui dan tur chu hetiang hian rel a ni:
Zing kar, dar 08:58 ah Governor in Lammual a thleng anga, hemi hnu lawk, dar 09:00 ah India Hnam Puanzar pawt pharh in Parade Contingent hrang hrang Hnam Puanzar zahna chibaibukte a endik zawh ah Republic Day thuchah a sawi dawn a ni. Governor in thuchah a sawi zawh ah hian lawmman semna hun hman a ni ang.
Republic Day lawmna inkhawm hi FM Zoawi chuan live in a pechhuak ang.
Lammual inkhawm zawh, chawhma dar 11:00 ah sawmbik ten Circular Lawn, Raj Bhavan ah thingpui-ruai an kil ang.
