Vawiin khan MJA Press Club, Lunglei-ah kartin chhuak chanchinbu Ziakfung chu Pi Mina Zoliani Joute, IPRO, Lunglei in a tlangzarh.

He inkhawm hi Pu H.Lalthansanga, Editor Lunglei Times in a kaihruai a, Rbt. T.Lalhlimpuia, Asst. Secretary MTKP in hunserh hmangin, kartin chhuak chanchinbu tlangzarhtu Pi Mina Zoliani Joute chuan thusawiin Ziakfung kartin chhuak chanchinbu tlangzarh theia a awm hi Lunglei District tan hmasawnna rahbi thar pakhat a ni a ti. Chanchinbu miten kan thuchhuah te hi a dik em tih finfiahna nei hmasa thin turin a chah a, a print leh layout felfai taka siam turin a duh thu a sawi.

Ziakfung Editor V.Rokhawlkima leh a thawhpuite an kal zelna turah duhsakna a hlan bawk.K Lalrinpui, President MJA, Lunglei pawh in thusawiin Lunglei district huap weekly magazine a awm lo hi rualawh thlak hle a, hetiang thil thar MJA huang chhunga a awm ta hi lawmawm a tih thu sawiin, hmasawnna duhawm tak a ni a ti.

He chanchinbu Editor V.Rokhawlkima, MJA member chuan vawiin ni a Ziakfung an tlangzarhna a lo kal zawng zawng te hnenah lawmthu sawiin, Editorial board te hmelhriat tirna neiin he chanchinbu Ziakfung hi phek riat (8), variety thei ang bera tih chhuah a nih tur thu a sawi.