Sawrkar laipui Ministry of Housing & Urban Affairs hnuaia Mission/Scheme hrang hrang kalpui dan thlirletna, Review Meeting neih mekah Union Minister Shri Hardeep Singh Puri chuan Pu Zodintluanga, UD&PA Minister hnenah Scheme leh Mission hrang hrang thawh chhunzawmna tur cheng vaibelchhe 22. 89 Sanction Order hlanin, AMRUT hnathawh chhunzawmna turin Second Installment cheng vaibelchhe 56.09 pek thuai a tiam bawk. North-Eastern Region Urban Minister te hian Union Housing & Urban Affairs Minister kaihhruaiin Mission leh Scheme hrang hrang hmalak mek dan an thlir hova. North-Eastern State zingah Scheme hrang hrangah Mizoram an ti tha lawr hle a ni.

THE TELEGRAPH 26th October, 2017 chhuakah chuan North-East State zingah Mizoram State chauh hi duhthusam anga AMRUT Scheme thawk thei an nih thu Ministry lam hian thu an chhuah an tarlang nghe nghe a. Mizoram hi AMRUT Mission bikah India rama State ti tha zual 10 zingah a tel bawk a ni. Mizoram in Mission/Scheme hrang hranga a tihthat avangin kutbenga lawmpui turin Union Minister hian Meeting a sawm hial a ni.

AMRUT Scheme ah hian Mizoram chauh hi Mission Period chhunga SAAP (State Annual Action Plan) zawng zawng pawm sak tawh awm chhun a ni a, heng SAAP pathum pawm tawhahte hian sum thawhkhatna (1st installment) a lo dawng tawh a ni. Minister hian hna chak taka thawh zawh tawh a nih avangin 2nd Installment release thuai tura Union Minister hnena a ngen angin Union Minister hian Rs. 56.09 crore  a rang thei ang bera lo bawhzui nghal a tiam bawk.

NULM (National Urban Livelihoods Mission) ah pawh Mizoram chu North-Eastern Region ah a titha lawr lak a, India pumpui ranking ah pawh 18-na a hauh mek a. Tun anga a kal chhoh zel chuan Mizoram hi India rama he Scheme thawk tha ber pawl ni thuai tura beisei a nih thu Ministry lam hian an sawi a. He Mission hnuaia Sub-Mission pahnih Scheme of Shelters for Urban Homeless (SUH) leh Self-Employment Programme (SEP) ah te chuan Mizoram hi India rama thawk tha ber zinga a tel thu tarlan a ni bawk.

Union Minister in Review Meeting zawha Press Meet a neihna ah hian Mizoram State tana Mission leh Scheme hrang hrang thawh chhunzawmna turin Sanction Order Rs. 22.89 crore a hlan nghal bawk a. Mizoram State chu North-East State zingah thawk chak leh hmahruaitu a nih thu uar takin Press mite hmaah a sawi bawk a, India ram State zingah pawh a thawk tha pawl tak zingah a tel thu a tarlang bawk a ni.

Mizoram chu North-East State zinga pawna inthiar awm tawhlohna Open Defecation Free (ODF) hmasa ber tura beisei a nih thu pawh Ministry in sawiin December 2017 hma ngeia ODF ni thei tura tan la turin an ngen a.  Pu Zodintluanga chuan Lawngtlai khawpui bak khawpui dang zawng zawng ODF a puan a nih tawh thu leh heng khawpui dangte hi Ministry lamin verification an tih chak chuan December hmaa State pum ODF a puan theih a beisei thu a sawi.

He Meeting ah hian North-East atanga Urban Minister te an tel kim hle a. Central Mission/Scheme dang dang – Housing For All (Urban) te, Swachh Bharat Mission (Urban) te, Smart Citiies Mission leh NERCCDIP (ADB) te pawh uluk leh chipchiar taka thlir ho a ni bawk.