Nimin khan Dr. Charan Das Mahant, Union Minister of State, Agriculture & Food Processing Industries chuan zan khat riakin Aizawl a lo thleng.

Nimin tlai vek khan Dr. Charan Das Mahant chuan State Guest House Conference Hall-ah Agriculture Minister Pu R. Lalzirliana leh Agriculture & Allied Departments-a hotute meeting a neihpui nghal a. He Review Meeting, Pu Lalram Thanga, IFS, Principal Secretary, Agriculture kaihhruaiah hian Lt. Col. Z.S. Zuala, Parliamentary Secretary, Agriculture leh Officer pawimawh engemawzat an tel a ni.

Union Minister chuan Mizoram a rawn zin thei chu lawmawm a tih thu leh a lo suangtuah dan ai maha nuam leh mawi a tihthu a sawi. RKVY hnuaia hmalakna hrang hrang an thlirho hnuin Union Minister chuan RKVY kalpui dan chu tha thawhkhat tiin he programme a hlawhtlin zel theih nan theihtawp chhuah zel turin a ngen.

Pu R. Lalzirliana, Agriculture Minister, Mizoram chuan Union Minister-in Mizoram a rawn tlawh thei chu lawmawm a tih rualin hei hian Mizoram tan rah duhawm tak chhuah ngei se a duh thu sawiin Mizoram-a Horticulture College dinna tura Union Minister, Pu Sharad Pawar-a’n a lo sawi tawh chu tihpuitlin thuai a nih theihna tura hma la chhunzawm zel turin a ngen bawk.

Union Minister rawn tawiawmtu Sawrkar Laipuia Joint Secretary Pi Rani Kumudini chuan Mizoram population chu a tlem avangin farm mechanization a hmalakna tur thil tam tak a awm a rin ngei thu sawiin hemi lama hmalaknaah theihtawp  chhuahpui a tum thu a sawi bawk. Union Minister tawiawmtu dang Joint Secretary Pi Anuradha Prasad chuan Mizoram-in thlai leh thei sawngbawlna kawnga hma a sawn theih nan nasa lehzual zawka Ministry hma lak a, puih a tum thu a sawi bawk.

He Review Meeting-ah hian Central Scheme hrang hrang, Rashtrya Krishi Vikash Yojana (RKVY), National Horticulture Mission (NHM), National Mission on Food Processing (NMFP) ah te Line Department hrang hrang hmalakna te Power Point Presentation hmangin Director-ten an entir a, sawihona neihzui nghal a ni bawk.

Union Minister pual hian Pu R. Lalzirliana hian State Guest House, Chaltlang-ah zanriah a buatsaih sak nghal bawk. Union Minister zanriah kilpui naah hian Industries Minister Pu H Rohluna, Soil & Water Conservation Minister Pu Lalrinmawia Ralte leh AH & Vety Minister Pu Ngunlianchunga te an tel a ni.

Union Minister leh amah rawn tawiawmtu Pi I. Rani Kumudhini, Joint Secretary, Trade and M&T, Department of Agriculture & Cooperation, Govt. of India leh Pi Anuradha Prasad, Joint Secretary, Ministry of Food Processing Industries, Govt. of India te hian vawiin chawhma lam khan Selesih-a Central Agricultural University tlawh a hun pawimawh an hmanpui hnuah New Delhi an hawthla leh nghal a ni.