Mizoram tlawh a lo zin Union Minister of State (Agriculture & Food Processing) Dr. Charan Das Mahant chuan vawiin khan College of Veterinary Sciences, Central Agricultural University, Selesih ah Krishi Vigyan Kendra (KVK) leh Agricultural Technology Information Centre (ATIC) building a hawng.
He building hawnna inkhawm a Khuallian, Union Minister chuan kuthnathawktute tanpuina chanchinbu “Kisan Diary” chu a tlangzarh nghal a. Union Minister hian KVK leh ATIC building sak thar a nih chu lawmawm a tih thu sawiin, kuthnathawktute tan malsawmna a nih a beisei thu a tarlang a. India Hmarchhak leilung leh sik leh sa awm dan hi thlai leh thei in an ngeih hle a, Mizoram ngei pawh heng thlai leh thei tharchhuah kawngah hian hma a sawn chak hle a ni a ti. Kuthnathawh hi ram pumah eizawnna pawimawh ber pakhat a nih thu leh, chuvang chuan hlawk zawk a ran vulh leh lo neih a nih theih nan tunlai thiamna te hman a pawimawh a ni, Union Minister chuan a ti a. KVK kaltlang a mi tam zawk tanpui a nih theih nan kalkhawm te chu theih tawp chhuah turin a chah a ni.
AH&Vety. Minister Pu Ngunlianchunga chu Khualzahawm niin, ran vulh leh lo nei mite tan a hamthatna siam a ni zel chu lawmawm a tih thu a sawi a. Mizoram leh India ram pawn a ran enkawl dan tha zawk an neih te zir chiang a, kan ram kuthnathawktuten an hman ve zel theih nan KVK chu hman tangkai a nih a beisei thu a sawi bawk.
KVK leh ATIC building hawnna inkhawmah hian Central Agricultural University Vice Chancellor Prof. S.N. Puri chuan building hawnna inkhawma Union Minister leh sorkar mi pawimawh lo tel te chungah lawmthu sawiin, KVK hmalakna thenkhat a tarlang bawk. Food Processing Industries a Joint Secretary Pi Anuradha Prasad chu he inkhawmah hian a tel bawk a ni.
KVK & ATIC hi CAU hruaina hnuaiah awmin, kum 2005 khan lungphum niin, 2007 atang khan bul tan a ni a. Programme Coordinator kaihhruaina hnuaih Subject Matter Specialist (SMS) 5, Programme Assistant (PA) 2 leh staff dangte nen chak tak leh tluang takin a kal mek a. Selesih, Durtlang, Sihphir leh Mizoram hmun hrang hranga lo nei mite leh ran vulhtuten KVK hi chhawrin an hmang tangkai hle a ni.
Union Minister Dr. Charan Das Mahant chuan Central Agriculture University hmunhma fangin, AH& Veterinary Farm, Selesih a Regional Boar Semen Station chu a tlawh bawk a. Mizoramin vawk kah rai kawnga hma a lak that em avangin Sorkar laipui chuan India Hmarchhak pum a headquarter leh training nan a hman turin Regional Boar Semen Station hi siam sakin, hawn mai theih a peihfel a ni tawh a ni.
