3303/2023-2024
Aizawl the 10th January, 2024 : Ministry of Rural Development chuan nimin January ni 9, 2024 khan Wage Component atan Rs.164.27 crore a rawn release.
Mahatma Gandhi NREGA (MGNREGA) hnuaia mipui Job Card holder-te hlawh (Wage) pek dan chungchang hi Rural Development Department, Mizoram Sawrkar chuan mipuite hnenah sawifiah tulin a hria a. MGNREG Act leh Operational Guidelines angin MGNREGA hnuaia mipuite inhlawhna (wage) hi Mizoramah pawh thlatin tluang taka kalpui thin a ni a. Chutih laiin, tunhnaiah thingtlang mipuite inhlawhna Central in a la release loh avangin Job Card holders te account-a la lut lo a awm nual tih hriat a ni a. MGNREGA hnuaia thingtlang mipuite inhlawhna Wage Payment hi Central Sawrkar duhdan leh ruahmanna angin online leh electronic payment vek in NeFMS hmanga kalpui a ni a. Mipuite inhlawhna mil zelin Software-NREGASoft hmanga FTO (Fund Transfer Order) te MIS ah siam zel thin a ni. Heng FTO hmang hian Central Sawrkar chuan hnathawktute/Job card neitute Bank Account-ah direct-in inhlawhna pawisa hi a rawn thun thin a ni.
MGNREGA hnuaia inhlawhna Wages bik hi Central Sawrkar atanga 100% direct funding a ni a. Wage Payment hi Mizoram Sawrkar Finance Department kaltlang lo in, Job Card holder te Account-ah Direct Benefit Transfer (DBT) hmangin Central Sawrkar-in a rawn thun (credit) thin a. Mipuite inhlawhna ang zelin Mizoram Sawrkar Rural Development Department chuan FTO hi MIS-ah District leh Block tina thawktute kaltlangin a siam (generate) sak nghal zel thin.
Tun dinhmunah, Mizoram Sawrkarin tih khawtlai (pending) engmah a nei lo a ni. In ruahman lawk ngai hrang hrang; heng - FTO siam (generate) leh Utilization Cerftificate (UC) thehluhte pawh a ti vek tawh zawk a ni. Central Sawrkarah a rang lama mipuite inhlawhna release thuai turin a dil a. Central Sawrkar pawhin a tah tawlin mipui inhlawhna leiba (liability) te hi a rawn clear ve leh mai thin. Ministry of Rural Development chuan ni 9 January 2024 khan Wage Component atan Rs.164.27 crore a rawn release a. Tun-a Wage Payment la clear loh te pawh clear vek tura hmalak mek zel a ni a, direct benefit transfer hmang-a mipui te account ah a lut vek dawn a ni. Rural Development Department chuan mipuite lo chiai lo tur leh dawhthei taka lo nghak hram hram turin a ngen a ni.
