3302/2023-2024

Aizawl, the 10th January, 2024: Art & Culture Minister Pu C. Lalsawivunga chuan vawiin chawhma dar 11:00 khan a Pisa, MINECO-ah Central Young Mizo Association (CYMA) Office Bearer (OB) te lengah sawmin Chapchar Kut lawm dan tur leh pawimawh dangte a sawipui.

Art & Culture Minister Pu C. Lalsawivunga chuan Chapchar Kut hman dan tur chungchang Department hotute nena sawihona hmasa neih a nih tawh thu sawiin, hlawhtling taka kut lawm a nih theih nana sawrkar kutke pawimawh tak YMA hotute nena inrawnkhawma neih a ni chu lawmawm a tih thu a sawi a. Kalkhawmte chu tun aia hmasawn leh hlawk zawka kut lawm a nih theihna tura ngaihtuahna seng turin a chah a. Hnam inpumkhatna leh hnam ziarangte chawisan a nih theih nana hmalak tlan a pawimawh thu a sawi bawk.

He hunah hian Chapchar Kut hman tawh thin dante aia tha zawk leh hmasawn ngaihnate, hnam ziarang leh nunphungte zau zawka phochhuah a nih theih nana hmalak tulte, sum leh pai neih angte awmze nei leh inrenchem taka hman a tul thute, mipuite'n hlawk leh tangkai zawka kut an lawm theih nana pawimawh leh tul dangte zau taka sawiho a ni a. Chapchar Kut Organising Committee chungchangte bakah Chapchar Kut chu hnam inpumkhatna leh inunauna tha zawk siam nana hman tangkai dan turte sawiho a ni a. Rawtna leh pawimawh tihte chu Chief Minister kaihhruai Chapchar Kut Organising Committee thutkhawm neih huna pawmpui tura chhawpchhuah ni se tih a ni a. Remchang hmasa berah thingpui inhona leh inkawmhona hun huapzau zawka neih ni se tih a ni bawk.

Pu C. Lalsawivunga hi Art & Culture Department atangin Secretary Pu Lalthansanga leh Joint Secretary Pi Zonunthari te'n an tawiawm a. Central YMA aiawhin President Pu Lalhmachhuana, OB dang Vice President Prof. Lalnuntluanga, General Secretary Prof. Malsawmliana, Asst. General Secretary Pu Fabian Lalfakawma, Treasurer Pu Roneihthanga leh Financial Secretary Pu MS Ralte te an tel a ni.