3301/2023-2024

2024 Pawlkut thla ni 10: Vawiin chhun dar 12 khan Kolasib District Information & Public Relations Officer Pu C. Lalhruaitluanga hovin DIPRO office-ah DIPRO office staff leh Mizoram Journalists' Association (MJA), Kolasib District member-te chuan kum thar inhlan tharna hun hmangin, chhun thingpui an in ho.

Kolasib DIPRO Pu C. Lalhruaitluanga chuan hun kaihruaiin, Pu Albert Lalnunsanga Khawbung, LDC, DIPRO office chuan Pathian hnena inhlanna hunserh a hmang a. Hemi hnu hian kum 2023 thlir letna leh kum thara thawh ho zel dan tur sawi hona hun hman zui a ni.

DIPRO Pu C. Lalhruaitluanga chuan kum 2023-ah District MJA te thlawpna leh thawhpuina avangin District I&PR Office-in hna ṭha takin a thawk thei tih sawiin, MJA te chungah lawm thu a sawi a. Thawh hona chungchanga tihfuh tawk loh awm theiah thupha chawiin, kum thar 2024-ah ṭha tak leh lungrual taka thawh hona chhawm nun zel a beisei thu a sawi.

Pu C. Lalhruaitluanga chuan DIPRO leh staff-te chuan an hna thawhnaah fuihna leh ṭawiawmna an mamawh hle tih sawiin, MJA te chu inthlahrung lova a ṭulna apiangah DIPRO leh staff-te fuih leh finchhuah hreh lo turin a sawm a. MJA te pawh thurawn pek an ngaihnaah thurawn pek an hreh dawn lo tih a sawi.

Kolasib DIPRO Pu C. Lalhruaitluanga chuan kum tharah chanchinbute  hma sawn tura insangmar turin a chah a. Chanchinbu chhuah ṭhat thu-ah leh thu chhuah chungchangah Kolasib MJA te chu fakawm a tih thu sawiin, an thu chhuahah thu lai la taka chhuah tur leh dikna ṭan tlat zel turin a chah a. District MJA te'n sawrkar an thawhpui ṭha ṭhin chu lawmawm a tih thu sawiin, kum tharah pawh sawrkar department hrang hrangte nen thawh hona ṭha zawk neih tum turin a fuih a. Mipui tana hmasawnna tur lam hawi thu ziak uar tura a duh thu a sawi bawk.

MJA Kolasib District President Pu Andrew Vanlalauva pawhin thu sawiin, DIPRO-in kum thar inhlan tharna leh inkawm hona hun a buatsaih chu lawmawm a tih thu a sawi a. Fuihna thu ṭha tak tak a sawite chu MJA member-te'n hmasawn nan an hman ngei a beisei thu a sawi a. Kolasib MJA te chuan hun kal tawha an lo tih ṭhin angin DIPRO leh staff-te mai bakah, sawrkar department dangte pawh ṭha takin an thawhpui zel dawn tih sawiin, kal khawmte chu mahni hna thawhna ṭheuhvah hma sawn zel tura inbuatsaih turin a chah bawk.

He hunah hian Prominent Press Representative Pu S. Lalhmachhuana leh District MJA Vice President Pu R. Lalhmingthanga te pawhin thu an sawi a. DIPRO chuan MJA Kolasib District member, accredited journalist-te chu Mizoram Calendar 2024 leh Mizoram Diary 2024 a hlan nghal bawk a ni.