3300/2023-2024

Dated Aizawl, the 10th January, 2024: Vawiin khan Chief Minister hovin CM Conference Hall ah Lengpui Airport enkawltu dang hnena hlan chungchang sawiin sawrkar mi pawimawhte an thukhawm a. Mizoram tana tha ber tur zawnga enkawltu tur hi thlan a nih theih nana lo bawh zuitu tur Working Group din ni se, an ti.

Meeting-ah hian India ram hmun danga Airport engemawzat, Airport Authority of India kuta awm mek te an enkawl zui dan te leh private company ten (PPP Mode-a) an kuta awm an enkawl dan chanchin tlangpui tarlan a ni. Chungte ngaihtuah chung chuan Airport Authority of India hnenah nge private company te hnena hlan tha zawk dawn a, Mizoram tana hlawk ber tur enge ni ang tih kil hrang hranga khaikhinna chipchiar lo neitu tur Working Committee (working group) din ni se, annin a rang lama lo umzuiin, report kimchang an neih hunah thutkhawm leh ni se, an ti a ni.

Lengpui Airport ram venhim dan tur te, Airport hnathawktu pawimawh tuna dah belh nghal ngai nia lang te pawh meetingah hian sawi rik a ni.

Meeting ah hian Pu TBC Lalvenchhunga, Adviser to CM, Finance, Pu Haukhuma Hauzel, IAS, Vice Chairman Resource Mobilisation Committee, Dr. Renu Sharma, IAS, Chief Secretary leh official pawimawh te an tel a ni.