Vawiin khan Governor Kummanam Rajasekharan chuan State Archive Office, Babutlang a mi chu a tlawh a. Art & Culture official te kawmin mumal zawka Records leh Documents thehluh a nih theih dan tur te leh Sawrkar Pisa ten Archive awmzia an hriat a pawimawh na te a sawipui a ni.

State Archive Office hnathawkte nena an inkawmnaah Governor Kummanam Rajasekharan chuan Mizoramah record leh document vawn that kawngah nasa taka tan lak a ngai tih a sawi a. Sawrkar Department hrang hrang te pawhin document dahthat leh archive hman nachang an hriat a tul hle a ni a ti. "Sawrkar Document, Order leh Record te hi History behchhan leh ziahna hmanraw rintlak ber a ni a. Tupawhin History ziak mahse thudik tlawh chhan tur leh tanchhan tura  record rintlak te a neih loh chuan History belhchian dawllo a ziak a ni. History ziak tur emaw research beitur ten an pan hmasak ber thin chu Archive leh Library te a ni. Tunah hian State Archive hi ngaihpawimawh a nih loh chuan thangthar ten tuna thil thleng mek, nakin lawka Mizo History ni mai turte an hrechiang thei dawn lo a ni. Chuvangin tan kan lak tlan a ngai ; Department te pawhin an ngaih pawimawh ngei ka beisei a ni", a ti. Archive a Documents leh Records te dah tha tura Art & Culture in hma a lo lakna te leh meeting a lo koh tawhna te chu a lo zirchian tu thu a sawi a. Art & Culture Department  a thawk te pawh an hmalak tawhna te chu thar thawh tura fuihin  an thlen chin te pawh a hnenah hriattir ve turin a chah a ni.

Vawiin Governor's visit programme-ah hian Governor chu Art & Culture Director Pu R. Hmingthanzuala leh a thawhpuite chuan lo dawngsawngin   State Archive Office chhunga records leh document dahthatte leh lekhabu vawn thatna khawl te an en pui a.  Hemi hnu hian an hmalakna te zawtin Governor chuan Archive hnathawkte chu  a kawm leh a ni. He hunah hian Archivist Pu F.Lalthanmawia chuan State Archive in sawrkar lehkha pawimawhte  lakkhawm  leh  dahthat a nih theihna tura sawrkar department hrang hrangte an dawr tawh dan bakah  an thlen chin te a sawifiah hmasa a.Tuna lehkhabu leh record pawimawh State Archive a awm mek te chu Digitize tura hmalak mek leh engemaw zah chu digitized tawh a ni a ti.  Sawrkar Department hrang hrangah  document hlui te Archive-ah dah tha tura ngenna chu ngaih pawimawh a ni lo tih sawiin sawrkar office-ah te Record Room pawh siam a la awm meuh lo tih a sawi a ni. Sawrkar inkaihruaina ang chuan kum 25  hmalama sawrkar file,order, document leh record te chu Archive-ah thehluh thin tur a ni a.  Sawrkar Office tinah Record room pawh neih theuh tur a ni bawk a ni.