‘Mi retheite dawmkan hi sawrkar thil tum ber a ni,” Pu K.Lalrinthanga, Serlui bialtu MLA chuan a ti.

He thu hi a bial chhung khaw hrang hrang 5-a BNRGSK building sak tharte hawnga a sawi a ni a. Building thar a hawn te hi N.Chawnpui khuaa Rs.6,92,000/- senga sak leh Vairengte II-a Rs.9,66,000/- senga sak te an ni a. Khaw tinah hian hawnna vantlang inkhawm neih a ni.

Building hrang hrangte a hawn paha thuchah sawiin Pu K.Lalrinthanga chuan BNRGSK building te hi sawrkarin mipui dawm kan nana hmanraw tamtak a chhawpchhuahte zinga mi an ni, a ti a. Central sawrkar UPA-in a duan MGNREGS hmangin kan zoram ngeiah pawh mi tamtak dawmkan mek an ni a. Kan sawrkar din tirh phata a flagship programme NLUP pawh vawiin niah chuan a hlawhtlinna kan hmu chho mek a. Mi retheite dawmkan a, mual eng hmu pha tura buatsaih leh eizawnna ngelnghet chhawpchhuah sak hi kan tum tlat a ni, Pu Rinthanga chuan a ti. Tuna V.C. House changtlung taka sakte hi khaw mipui ten heng sawrkar scheme hrang hrangte an chhawr theihna tur hmanraw pawimawh tak a ni, a ti bawk.

Pi Maria C.T.Zuali, Project Director pawhin thu sawiin khawtlang tih hmasawn kawngah V.C. te chu diktaka hnathawk turin a chah a. Sawrkar sum hmaanga a taka thawktu an nih avangin hlepruk tumna an neih a thiang lova. A department lam pawhin tunhma aia an vil ngun dawn thu sawiin khawtlang leh ram ti phuisui zawnga chak taka thawhpuiah V.C. te chu a sawm a ni.

BNRGSK building hawnnaah hian Pu Lalchungnunga, BDO, Bilkhawthlir bakah khaw tina V.C. leh mipui engemaw zat an tel a ni.