Ni 10-11.4.2013 khan Mizo lalte zinga hmeltha leh huaisen, Lalvunga Hualngo hriatrengna Lung phun a ni a. Art & Culture Minister Pu P.C Zoram Sangliana chu khuallian a ni.

Lungphun hawnna-ah khuallian Pu P.C Zoram Sangliana chuan, “Pathianin Mizova min siam hi malsawmna leh duhsakna a ni a, kan vannei hle a ni” a ti. Khuallian chuan, “Mizote chanchina Arsi eng tak anga mi langsar Lalvunga Hualngo, a hunlai Mizo lalte zinga mi hriat lar ber nia chhal ngam lungphun a ni ta chu lawmawm a tih thu a sawi a. Hetiang tih nachang hria a, mahni hnam chawimawi duhna thinlung Sazep khawtlang mipuiten an pu chu lawmawm a tih thu a sawi bawk.

Pu P.C Zoram Sangliana chuan, lal huaisen, tlawmngai leh a hunlai a hmelma te tan pawha thawm na tak lung phun a ni ta hian hmun tina Mizo hnamte rilru leh thinlungah lawmna nasa tak a siam reng tawh tih sawiin Tuipuiral mipuiten mahni hnam sulhnu vawn that leh humhalh kawnga an intlansiakna hian hmun danga Mizote tan pawh rilru thar a pek a beisei thu a sawi a. Amaherawh chu henglaia pipu te sulhnu thenkhat hlutna leh ropuina bo thak khawpa tunlai taka siam danglam a ni erawh thil pawi tak, hun lo kal leh zelah tih tawh loh atana thil tha tak a ni a ti.

Pu P.C Zoram Sangliana chuan Kristianna huang chhungah hnam culture hlim takin a hman theih tih a chiang a, mahni hnam leh hnam tih dan hlutna kawngah Mizo te kan harh thar nasa a, harh zual deuh deuh tura a duh thu a sawi bawk.

Lalvunga hi Mizo lal te zingah chuan chanchin ngah leh tunlai mite tan pawha hriat hlawh ber pawl a ni a, Chawngmura fapa te pathum zinga a fatlum ber niin, a pa lalna Hriangngai leh Chawngtui atanga a u te nen in dangin, Phaipumah khua an din a. Chu khuaah chuan Lalvunga chu lal-ah a thu a. Lalvunga lalna chin chu a hmingah “Farzawl” an vuah a ni. Lalvunga khuaah hian Mizo nula leh tlangval te zingah hmaltha leh duhawm ber pawla an sawi Lianchi-a leh Darthiangi (Chertuala nupui) pawh an awm a. Lalvunga hi a hmeltha leh amah ertute tan a hnawksak em vangin itsikna leh thikna vangin bum a ni a. Sazep ram ‘Iva’ lui hnar ‘Thinghrangkawnah an that a. A ruang chu miin an hmuh mai loh nan uluk taka thukru in, Sazep ram ‘Maihawp’ ram ‘Lungpher puk’-ah an dah ta a ni. Lalvunga luruh hi Mizoram State Museum-ah tunah hian vawn that mek a ni.

Art & Culture Minister Pu P.C Zoram Sangliana chuan Lalvunga lungphun Organising Committee-in an buatsaih ‘Mizo Lal Ropui Lalvunga Hualngo’ tih lehkhabu a tlangzarh a. Hemi hunah hian khawchhak (Myanmar) atangin lungphun hmang tura mi sawmbik te, department hotute leh sorkar mi pawimawh thahnem takin an tawiawm a ni.

Attachment

  • Loading attachment...