April ni 11, Ningani khan Vaphai khaw dai, Hriangkawn-ah pipu te sulhnu humhalhna tur hmalakna bul tanna lungphum chu Art and Culture Minister Pu PC Zoram Sangliana’n a phum.

Pu PC Zoram Sangliana chuan Mizo te Mizoram an luh thlakna hmasa, pi pu te sulhnu, Mizo thangthar te tana nung renga a awm theih nan Vaphai khaw mipui ten mahni mimal ram pawh ui lova ‘Thlangtlak mual’ an siam chu lawmawm a tih thu leh Mizo Culture vawnhim nana an inpekna ropui a tih thu a sawi a. He an thil tih hi mahni khua tihlar tumna, hmundang aia pawimawh bik ni a inhriatna, thliarkar rilru pu lova zau taka kalpui a, Mizo fate tipumkhat lehzual tu hmanraw tangkai a nih ngei a rin thu a sawi a ni. 2010 March thlaa Mizo nula leh tlangval ten Cheraw hmanga World Record an siam atang khan Mizote zingah mahni hnam rohlu leh ziarang chawisan duhna thinlung nasa tak a piang thar a, thalaite thinlung chawk harhin cultural revolution a thleng mek tih sawiin Pu PC Zoram Sangliana chuan he harh tharna hi tawp mai lova a zual zel a beisei thu a sawi a ni.

Mizo pi pu te kha Tiau chhakah, Run leh Tiau inkarah rei tak khawsain Tiau lui thlang lam an rawn kan a. Tiau chhak lama an awmna hlui leh sulhnu, an khaw hluite, tlang khan leh mual dung insuihkhawm dante thlirin Saikhum zawn vel atangin Tiau an kan ni ngeia a lan thu sawiin Art & Culture Minister chuan Thlangtlak Mual hmun chu pipu te sulhnu vawn thatna awm reng leh a hming pawh inhmeh tak nia a ngaih thu a sawi bawk.

Thlangtlak Mual hmun hi Sakhaw-a Hmun ti a sawi thin a ni a. Kum 2009 November thlaa Vaphai khawtlang hruaitu leh tlawmngai pawl hrang hrang kalkhawm ten “Pipu Ro Lung Committee” din in Mizo hnam leh nunphung thangthar ten an vawn nun zel theih nan Vaphai leh a chhehvela mi hmingthang te lungphun leh zokhua din an rel a. Chief Patron member, Art & Culture Minister Pu PC Zoram Sangliana chu a hmun hming phuah tura an ngen angin “Thlangtlak Mual” tih hi a vuah a ni

Thlangtlak Mual lungphum phum programme hi ni hnih chhung hman niin a ni hnihna-ah Central YMA President Pu T. Sangkunga chu khuallian niin Art & Culture Director Pu Ngurbiaka chu khual zahawm a ni. Vaphai khaw sat tu, an inpui tia an sawi Siallam khua atangin lamthiam te an lokal bakah Art & Culture Department atanga lamthiam leh zaithiam lokalte, Vaiphai khua leh an khaw thenawm Samthang atanga lamthiam lokal ten programme hman chhung zawng hian zai leh lamin mipui te an awi a ni.