Mizoram States Sports Council bultumin vawiin khan North East Games vawi 27-na a Mizoram aiawh te pual lawmpuina inkhawm chu I&PR Auditorium-ah buatsaih a ni a. Home Minister Pu R.Lalzirliana chuan khuallian chanchangin lawmpuina thu leh infiammi te fuihna thu a sawi a, Sports & Youth Services Secretary Pu R Lalvena chu khualzahawm a ni.

Mizoram infiammi leh an hruaitute, mi 208 te lawmna pual inkhawm hi MSSC Secretary Pu C. Laltlanthanga chuan a kaihruai a. Khuallian Home Minister chuan a thusawi bultan naah Sports Minister hlui leh Mizo infiammi te tana theihtawp lo chhuah ve thin MLA dinglai Pu B. Lalthlengliana thih thu in a barakhaih zia leh Mizoram leh a bikin infiammi te tan channa namen lo anih zia a sawi hmasa a.Tun tum NE Games vawi 27-na ah Mizoram chuan kumhmasa lama 1-na dinhmun hauh pha ta lova 2-na dinhmun changa an lo haw ta mai chu thil diklo engemaw avanga thleng anih a rin thu sawiin infiamna khawvelah pawh hian dikna chu a la dingchhuak ngei ngei ang, a ti a, Hmarchhak bial a ni emaw rampum leh khawvel huap ang pawhin mizo imfiammi te hian tan lak thar nan hmang se a duh thu a sawi a ni. Pu R.Lalzirliana chuan infiammi te tana thil pawimawh ber ber te chu hun vawn dik leh huaisenna a ni fo thin tiin, hei hian hlawhtlinna a thlen thin, a ti a. Tunhma an hunlai ve te khaikhin chuan thangthar infiammite chuan hamthatna leh hmanraw chhenfakawm tak tak an neih tawh a, chungte chu diktaka hmang thin turin a fuih a. Infiammi te chu nakina ram leh hnam nghahfak an nih avangin politics thila inchirhthehna leh ram kalphung hrang hrang hre ve zel tura chah in remna leh muanna vawnhim kawnga sorkar hmalakna te, dan leh thupek kenkawh leh thalai te nunsual laka venhim kawnga sorkar hmalakna hrang hrang te pawh hrethiam ve zel turin a fuih a ni.

Thusawitu dang khualzahawm Pu R.Lalvena chuan Mizoram Sorkarin kalphung thar pawimawh tak ‘Result Framework Document’ a bawhzui mek ah hian Sports Department leh Sports Association hrang hrang te thawh ho pawimawh tulzia a tarlanga, infiamna khawvel chu mite fakhlawh leh chawimawi hlawhna hmun anih ang bawkin sawiselna dawngtam ber an ni bawk thin, a ti.

Ne Games 27-na a Mizoram aiawhte zuk kal dan leh an chetdan tlangpui chu Pu H. Thangchungnunga Sports Promotion Officer leh Chief-De-Mission ni bawk chuan a sawi. Tuntum NE Games vawi 27-na Manipur khawpui Imphal a neih zawh takah khan Mizoram chu a pumpuiah point 44 hmuin Assam nen 2-na an ni a, Medal thahnem tak Taekwondo-ah Medal 19 la in Gold-6, Silver-2, Bronze-11; Juda-ah Medal 14 la in Gold-5, Silver-3, Bronze- 6; Boxing-ah Medal 8 la in Gold-3, Silver-3, Bronze-2; Table Tennis-ah Medal 4 la in Gold-3, Silver-1; Wushu-ah Medal 14 la in Gold-2, Silver-4, Bronze-8; Badminton-ah Medal 5 la in Gold-2, Silver-1, Bronze-2; Weightlifting-ah Medal 10 la in Gold-2, Silver-6, Bronze-2; Hockey-ah Medal 2 la in Gold-1, Bronze-1; Athletics-ah Medal 2 la in Silver-1, Bronze-1; Football-ah Medal 2 la in Bronze-2 te an rawn hawn a ni.