Chakma Autonomous District Council (CADC) General Election 2013 chungchangah State Election Commissioner Pu C. Ropianga chuan hetiang hian thupek a chhuah :

Chakma Autonomous District Council Inthlanpui vawi 9-na chu 17 April, 2013 zing dar 7:00 a.m. atanga tlai dar 5:00 p.m. hian neih a ni dawn ta a. Representation of the People Act, 1951 section 126-na in a sawi ang leh Model Code of Conduct para II (7) in a tarlan angin inthlan vote thlak zawh tlai dar 5:00 p.m. atanga chhiar leta darkar 48, ni 15th Appl, 2013 tlai dar 5:00 p.m. hian he inthlanpui atana campaign theihna hun chu a tawp ang. Ni 15th April, 2013 tlai dar 5:00 p.m. atanga ni 17th April, 2013 tlai dar 5:00 p.m. chhung hian mi tumahin a hnuaia tarlan te hi an ti tur a ni lo :

1. Inthlan kaihhnawih thila vantlang inkhawm leh kawngzawh buatsaih, kawngzawh leh vantlang inkhawm a tel leh thusawi;

2.Mipui hnena inthlan kaihhnawih thil Cinema, TV leh hetiang ang hmanrua hmanga tihchhuah/entir;

3. Inthlan kaihhnawih thu thehdarh nan a Musical Concert leh mipui vantlang hip khawm thei tur intihhlimna lampang chi reng reng buatsaih.

4. Opinion Poll/Exit Poll tihchhuah emaw puan zar;

5. SMS hmanga campaign.

Heng bakah hian campaigner tupawh campaign hun chhung a tawp veleh candidate leh an agent-te tih loh chuan an campaign-na huamchhungah vote an nei a nih loh chuan an campaign-na hmun an chhuahsan vek tur a ni.