No.1833/2020-2021

Aizawl, the 9th June 2020 : Vawiin khan SBI Foundation chuan Mizoram Sawrkar hnenah Personal Protective Equipment full set 600 cheng 11,94,000/- man hu an hlan a. Heng PPE hi Health Minister Dr. R. Lalthangliana hnenah SBI Foundation aiawhin Pu L.P. Lalchangkima, Regional Manager, SBI leh a thawhpui midang 2 ten MINECO tualah an hlan a ni.

Health & Family Welfare Minister Pisa a programme tawite neihah, Dr. R. Lalthangliana chuan SBI in heng bungrua Mizoramin a mamawh lai taka an rawn pe hi a hlu leh zual tiin Health Department leh Mizoram Sawrkar aiawhin SBI chungah lawmthu a sawi a. Mizoramin COVID-19 positive case kan neih chhoh mek laia hetiang thilpek SBI in an ruahman chu a lawmawm leh zual tiin Minister chuan a sawi.

He hunah hian Dr. R. Lalthangliana chuan vawiina Automated RNA Extractor khawl Sawrkarin a chah chuan Lengpui Airport a lo thlen a beisei thu a sawi a. He khawl leina tur ruahmanna hi Disaster Management & Rehabilitation kaltlanga tih a nih dan leh rang taka State Disaster Response Fund sum pawh a hemi atan hian ruahman a ni tiin Department chungah lawmthu a sawi a. Chutih rualin Chief Minister Pu Zoramthanga’n hripui dona kawnga mamawh hrang hrang leh khawl leina tur a ngaipawimawhin a tul leh mamawh awm apiang, Health Department in an dil te reng reng chu hnawl awm lova pek zel a nih thin thu a sawi a. Chief Minister inpeknaah Health Department chuan lawmthu a sawi nghal a ni, a ti. Khawvel pumin he thil hi a vawikhatna atan kan hmachhawn a, a tir atangin tumahin boruak awm dan tur an sawi thei lova, felfai taka ruahmanna pawh siam hleih theih a ni lo chungin zawi zawiin boruak inher ang zela ngaihtuah a ngai a. Mamawh dan a zirin sum pawh kan Chief Minister ruahmanna felfai tak, a hova kalpui zel a ni a; hei vang hian vawiin ni thlengin Pathian hruainaa tluang taka kan kal zel hi a lawmawm hle a ni, Health Minister chuan a ti.

He khawl hi natuk lamah Company engineer in ZMC-ah install fel beisei niin sample atangin RNA hi automatic a la in rang takin RT-PCR test a tih theih dawn a. He khawl hian a hmaa manual a RNA extraction tih chu a tul dawn loh vangin nitin sample 800 atanga 1000 vel test theih beisei a ni.

Pu L.P. Lalchangkima, Regional Manager, SBI chuan PPE hi SBI CSR ni lo, SBI malsawmna dang SBI Foundation kaltlanga pek a nih thu sawiin CSR kaltlangin Mizoram in a mamawh tul dang ventilator leh thil dang pekna tur cheng vaibelchhe 1.3 hu man pawh Head Office lamah thawn mek a nih thu sawiin beiseina sang tak an nei, a ti.

Health Minister hi Health Secretary Pu H. Lalengmawia; Principal Director Dr. F. Lallianhlira leh NHM Mission Director Dr. Eric Zomawia ten an tawiawm a ni.

Vawiina PPE set 600 hlan hi full set niin mask 2, Face Shield, Mit venna goggles, hand gloves, suit leh a paihna tur(bag) pawh a chhawm a, set khat hi Rs. 1990 man a ni. SBI Foundation hi India ram pumah SBI hnathawkten an phal anga sum an thawh atanga din niin ram pumah thil pek hrang hrang an lo hlan thin tawh a ni.