No.5286/2020-2021

Vawiin khan SBI Foundation chuan Mizoram Sawrkar hnenah Ventilator 7 an hlan a. Health Minister Dr. R. Lalthangliana hnenah SBI Foundation aiawhin Pu L.P. Lalchangkima, Regional Manager, SBI, Aizawl Region leh a thawhpui midang 2 ten Minister pisa ah heng khawl te hi an hlan a ni.

Health Minister Dr. R. Lalthangliana chuan State Bank of India inpekna ropui a tih thu sawiin COVID-19 dona kawngah pawh an thawk tha hle tih a taka hmutu a nih thu a sawi a. Kumin June thla khan kan mamawh vanglai takin PPE quality tha tak 600 lai min lo pek tawh bakah Ventilator pawh 3 lai min lo pe tawh bawkn a, Chief Minister's Relief Fund-ah Rs. nuai 7 lai an hlawh an thawhkhawm atangin an hlan tawh bawk a, Zoram mipuiten in hnathawh hi kan hre reng ang, a ti a. State Bank of India hi Zoram mipuiten COVID-19 kan dona kawngah an inhawng em em a, sawrkarin a mamawhna ah engtiklai pawhin tha tak leh rang takin min lo chhawn nghal vat zel a ni tih sawiin, State Bank of India, Mizoram bakah Headquarters lama an hotute chungah thinlung taka a lawm thu a sawi a ni.

Health Minister chuan Rapid Antigen Test kit 20,000 lai mai chu vawiin chhun khan Lengpui Airport-ah rawn phurh thlen a ni, a ti a. Directorate of Hospital & Medical Education (DHME) ami tur Rapid Antigen Test kit 9000 leh Zoram Medical College-a hman tur 1000 rawn phurh thlen a ni bawk, tih sawiin Rapid Antigen Test kit 30,000 order fel tawh a ni a. Karleh lamah a rawn thlen kan beisei a ni, a ti a. Heng zawng zawng hi kan Chief Minister zahawm tak Pu Zoramthanga remruatna fel tak zarah harsatna tawk lovin kan mamawhte a hun takah kan nei zel a, GAD Aviation Wing-a Principal Consultant Wing Commdr. J. Lalhmingliana'n kan mamawhte phurhluh chungchangah hma min laksak thin bawk a, Chief Secretary-in a hun leh tha zawng zawng sengin theihtawp chhuaha hma min lakpuina zarah tha takin hma kan la zel thei bawk a ni, a ti.

Health Minister chuan Private Hospital leh Private Laboratory-ah te COVID-19 sample test leh Rapid Antigen Test kan kalpui tan tur hian sample test chungchangah nasa takin min chhawk zangkhai thei tawh dawn a ni, a ti a. Tunhnaiah sample test tur a tam avangin contact tracing, sample collecting leh ZMC laboratory-a sample test buaipuitute an hah em em a, sample lakkhawm sa a tam avangin duh ang leh beisei angin sample test hna a kal chakpui theih loh a, sample test tul em em lo, remchang la a lo in test thinte kan awm niin a hriat bawk a. Sample latute leh ZMC hotute thu leh hla dawngsawng thiam a, lo dawh hram hram turin VLTF/LLTF leh mipuite a ngen a ni.

Pu L.P. Lalchangkima, Regional Manager, SBI chuan ventilator-te hi SBI Corporate Social Responsibility (CSR) kal tlang a pek a nih loh thu sawiin, SBI malsawmna dang "SBI Foundation" kaltlanga pek a nih thu a sawi a. Ventilator-te chu Mizoram sawrkarin a remchan dan ang anga an hman turin an hlan tih sawiin a tul a nih chuan khawl bun thlengin puih an inhuam thu a sawi. SBI hnathawkten an nihnih hlawh "PM CARES Fund" ah an chhunglut tawh tih a sawi bawk.

State Bank of India-in Mizoram sawrkar hnena Ventilator 7 an hlante hi Agva Healthcare siam "Agva Ventilator (AV-AD-COVID) a ni a, Ventilator pakhat hi Rs. 1,48,550/- man niin, GST nen avaiin Rs. 11,64,632/- man a ni.