No.5285/2020-2021

Dated Champhai, the 21st September, 2020: Vawiin khan DLAO Champhai buatsaihin East Tuipui A/C huamchhunga Village Council Executive Body thlan tharte pualin DLAO Conference Hall-ah training buatsaih a ni.

He hun hmanpuitu Pi Esther Leihang DLAO Champhai chuan VC thlan tharte chu a lawmpui thu sawiin, Village Council Court-chu Sawrkar rorelna hniam ber a nih loh thu leh Sawrkar rorelna intanna a nih zawk thu a sawi a. A bul tanna a dik loh chuan Sawrkar a kal dik theih loh avangin rorelna intanna VC te chu an pawimawh zia hre reng turin a chah a. Mipuite'n an aiawh tura an thlan tlin an nih hrerenga, a thlangtlingtu mipuite tibeidawng lo tura chahin, mipuite tana dik taka rorel tur an nih thu a sawi bawk.

DLAO chuan VC te chu kawng engkima hmasawn tum tura fuihin, an lo tih thin dante chu a that ber loh chang a awm theih avangin thil awm dan mila inherrema hmasawn zel tum turin a chah a. VC te inkaihhruaina dan uluk taka zirchianga an tih tur, mawhphurhna leh an thuneihna chinte hre chiang hle turin a chah a. VC te chu khawtlang hmellanna tak tak an nih avangin ro an relsak mipuite tana entawn tlaka nung turin a chah nghal bawk.

He training-ah hian Village Council rorelna chungchang leh Account vawn dan VC te hi zirtir niin, Pu K. Lalhmachhuana, Field Secretary leh Pu C.Vanlalhruaia UDC te’n zirtirna an pe a ni. Mizoram Finance Commission (MFC) 2019-2020 atanga Work Order 1st Installment pek chhuah nghal niin, East Tuipui A/C huamchhunga Village Council 25-te hnenah Rs 23,63,427/- sem chhuah a ni.

Ruahman dan chuan tunkar tluanin training hi buatsaih tum a ni a. Naktuk September Ni 22 ah Lengteng A/C, Ni 23 ah Tuichang A/C, Ni 24 ah Champhai North A/C, Ni 25 ah Champhai South A/C te tan training buatsaih a ni ang.