1640/2022-2023

Aizawl the 17th August, 2022 : Vawiin khan SCERT  auditorium-ah SCERT-in course chi hrang hrang an pek zir chhuakte chawimawina hun an hmang a, School Education Minister Pu Lalchhandama Ralte chuan khuallian niin a hmanpui a, School Education Secretary Dr Lalzirmawia Chhangte chu khualzahawm a ni.

School Education Minister chuan thusawiin Mizoramah mipui rin ngam sorkar sikul țha a awm theih nan training chhuakte chu an thawhna țheuhah missionary rilru pua an hna chhunzawm turin a sawm. Minister zirna siamțha turin zirtirtute tan training neih țhat a pawimawh hle a ni a ti a. Zirtirtute grade sang zawka an kai dawnin training an kal țha em tih chu tehfung atan hman a țul ta hle a ni a ti bawk. Training chhuakte chu an thil zirte an thawhna sikulah a taka hmang țheuh turin a chah a. An thil zirte an hman theih nan office lam pawhin a țul ang ang bawhzui anih tur thu a sawi bawk. Certificate course hrang hrang English Language Teaching te, Early Childhood Care & Education te, Guidance & Counselling te chu zirna atana hlu tak tak an ni a ti a. ECCE chu school 331 bawr velah hawn a ni tawh a, ECCE hi țha taka kalpui anih chuan hei hian enrolment pawh a tipung dawn a, sorkarin țan a la zel dawn a ni a ti.

Khualzahawm Dr Lalzirmawia Chhangte, Secretary pawhin thusawiin SCERT-in course hrang hranga kalpui chu lawmawm a tih thu a sawi a. Zirtirtute tan intuaihriam reng a ngai a, hetiang intuaihriamna Certificate course kalpui a ni chu a hlu hle a ni a ti a. Heng course zir chhuakte hi an thawh dan a danglam dawn a, an thawh danin awmzia a nei sawt dawn a, naupangin an hlawkpui hle dawn a, zirtirtute chu an thil zir te hmang peih turin a sawm bawk.

He felicitation programme hi SCERT Auditorium-ah neih hi Pi Laldawngliani Chawngthu, Director, SCERT in a kaihruai a, programme chhimtute lawmna thu a sawi. Dr. A Lalchhandami Fanai, Joint Director, SCERT chuan Course hrang hrang kalpui dan report a pe a. Course hrang 4 aiawh participants te hnen atangin feedback ngaihthlak a ni bawk

SCERT hian B.Ed Special Education (Hearing leh Visual) kum 2018 ațangin an kalpui a, seat 30 ve ve an nei a. Certificate course pathum an kalpui a,  Certificate course in English Language Teaching-ah zirtirtu  22 an zir zo thei a, Certificate Course in Early Child Care & Education-ah zirtirtu 24 in an zova, Certificate course in Guidance  & Counselling-ah zirtirtu 38 in an zir zo thei bawk. Certificate course te hi thla 6 chhung zir an ni.

Vawiina SCERT Course zir chhuak te chawimawina hunah hian khuallian leh khualzahawm bakah MBSE Chairman Pu JH Zoremthanga te, School Education Officer te, SCERT officer te,  faculty leh training chhuak te an tel a ni.