440/2025-2026

Champhai, 2nd May 2025: Vawiin khan SCERT Director Pi Caroline Zoramthangi chuan Champhai DIET-a NIELIT CCC Study Centre a hawng a, Mobile Application - DIET Champhai Management System a tlangzarh bawk.

Champhai DIET-a NIELIT Study Centre-ah hian a bul ṭan nan Computer 10 leh Instructor 1 a awm dawn a. July thla aṭang hian zirna ṭan tum a ni. Mobile Application DIET Champhai Management System (DIET CMS) hi Android Application niin DIET hnuaia Course Structure Management atan te, zirtirtu ten Class an lak zat leh subject an neih zat an en theih nan te, zirlaite result siamna atan te, attendance leh result enna atan te hman theih a ni dawn a. Hei bakah hian thil dang tam tak zirlai kaihhnawih atan te tihchangtlun zel tum a ni.

Tlangzarhna inkhawm tawi DIET Building Champhaia neihah  Pi Caroline Zoramthangi chuan NIELIT CCC Study Centre leh DIET CMS Application hawn/ tlangzarh theih a ni ta chu lawmawm a tih thu sawiin, zirlai ten ṭangkai taka an hman theih nan duhsakna a hlan a. Zirlaite chu an ngaihhlut zawng chhut ngun tur leh an dam chhan chiang turin a chah a. Zirtirtu ni tura an inpuahchahna kawngah theihtawp chhuah tura fuihin, SCERT Director chuan zirtir hna chu eizawnna atan chauh ni lovin khua leh tui ṭha, khawtlang leh ram tana mi chhenfakawm chher chhuahna a ni tih vawng reng turin a chah bawk a ni.

He hun hi Pi Hnamte Rebecca Lalbiakdiki, Lecturer, DIET, Champhai chuan a kaihruai a. Dr. H. Lalhruaitluanga, Principal, DIET leh Pi Lalnunsiami, Deputy Director, SCERT te pawhin thu an sawi a. Pi Vanlalruati, Lecturer, DIET in lawmthu sawiin, inkhawm a khar a ni.

Champhai DIET hi kum 2005 khan din a ni a, zirlai  752 an chhuak tawh a ni. Tun dinhmunah zirlai 97 awmin, Principal hovin zirtirtu 10 ten an enkawl mek a ni.